ޖިންސީ އަމަލު ހިންގަން ބޭނުން ކުރާ ސާމާނާއި ފައިސާ އާއެކު ހަށިވިއްކާ އަންހެނަކު ހައްޔަރުކޮށްފި

ހަށިވިއްކާ ކަމުގެ ތުހުމަތުގައި ބިދޭސީ އަންހެނަކު ހައްޔަރުކޮށްފި އެވެ.

ކްރިމިނަލް ކޯޓުން އިއްޔެ ނެރެފައިވާ ކޯޓު އަމުރެއްގައިވާ ގޮތުން މި މައްސަލައިގައި ހައްޔަރުކޮށްފައިވަނީ 34 އަހަރުގެ ވިއެޓްނާމް އަންހެނެކެވެ.

އޭނާގެ ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރު ކުރުމުން ވަނީ ބަންދަށް ފަސް ދުވަސް ޖަހައިފަ އެވެ. ސަބަބެއް ކަމަށް ބަންދު އަމުރުގައި ބުނެފައިވަނީ ހައްޔަރުކުރި ފަހުން 24 ގަޑިއިރު ހަމަވާން ކައިރިވިއިރުވެސް ތަރުޖަމާނެއް ލިބިފައިނުވާތީ އެވެ.

އަމުރުގައިވާ ގޮތުން އޭނާ ދިރިއުޅޭ ކޮޓަރިން ޖިންސީ އަމަލު ހިންގުމަށް ބޭނުން ކުރާ ސާމާނު ފެނިފައިވެއެވެ. ހަށިވިއްކާ ކަމަށް އޭނާ އިއުތިރާފު ވެފައިވާ ކަމަށްވެސް އަމުރުގައިވެ އެވެ.

މީގެ އިތުރުން އޭނާގެ އަތުން ފައިސާ ފެނިފައިވާ ކަމަށާއި އެ ފައިސާއަކީ ހަށިވިއްކައިގެން ހޯދާފައިވާ ފައިސާ ކަމަށް އެ އަންހެން މީހާ ބުނެފައިވާ ކަމަށްވެސް ކޯޓު އަމުރުގައިވެ އެވެ.