ރޯދަ ވީއްލަން ހެދި އޮރެންޖު ފަނި ފުޅި ބޯލުމުން ވަޅި ހަރައި މަރާލައިފި

ޝާހް އަލަމް، މެލޭޝިއާ: ރޯދަ ވީއްލަން ހަދާފައި ހުރި ޖޫސްފުޅި ބޯލުމުން ވަޅި ހަރައި މަރާލައިފި އެވެ.

ޝާހް އަލަމްގެ ޕޮލިސް ޗީފް އިގްބާލް އިބްރާހިމް މިއަދު ނެރުނު ނޫސް ބަޔާނެއްގައި ވިދާޅުވީ، އިއްޔެ އެ ހާދިސާ ހިނގީ ފެކްޓަރީއެއްގެ މުވައްޒަފުންތަކެއް ނިދަން ވެގެން، ޝިޕިން ކޮންޓެއިނަރަކުން ހަދާފައިވާ ހޮސްޓެލްއެއްގެ ތެރޭގައި ކަމަށެވެ.

އެގޮތުން މަރާލި 49 އަހަރުގެ ބަންގްލަދޭޝް މީހާ އުޅެމުންދިޔައީ 51 އަހަރުގެ ޕާކިސްތާން މީހަކާއެކު ކަމަށް ވިދާޅުވި އެވެ.

”އަހަރެމެން ސީންއަށް ދިޔައިރު 49 އަހަރުގެ ބަންގްލަދޭޝް މީހަކު އޮތީ މަރުވެފައި. ހިންގި ތަހުގީގުން އެނގުނު ގޮތުގައި ޕާކިސްތާން މީހާ ރޯދަ ވީއްލަން ހެދި އޮރެންޖު ޖޫސްފުޅި ބަންގްލަދޭޝް މީހާ ބޯލީ. އެކަމުގެ ރުޅީގައި ކިޗަން ވަޅިއަކުން އެތައް ތަނަކަށް ވަޅި ހެރީ،“ އިގްބާލް އިބްރާހިމް ވިދާޅުވި އެވެ.

އޭނާ ވިދާޅުވީ، އެ މައްސަލައިގައި ޕާކިސްތާން މީހާ މިހާރު ހައްޔަރުކޮށްފައިވާ ކަމަށެވެ.