ފަލަސްތީނުގެ ޣައްޒާގައި ދެމުން ގެންދާ ހަމަލާތައް ވަގުތުން ހުއްޓާލަން ގޮވާލައި އދ.ގެ ސަލާމަތީ މަޖިލީހުން އިއްޔެ ފާސްކުރި ގަރާރަށް ފުރިހަމައަށް ތަބާވުމަށް ރައީސް މުހައްމަދު މުއިއްޒު އިޒްރޭލަށް މިއަދު ގޮވާލައްވައިފި އެވެ.
އިޒްރޭލަށް ހަމާސް އިން މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހު ދޭން ފެށި ހަމަލާތަކާ ގުޅިގެން، ހަމާސް ނައްތާލަން ކަމަށް ބުނެ ޣައްޒާއަށް ދެމުން ގެންދާ ހަމަލާތައް ހުއްޓާލަން ގޮވާލައި ހުށަހެޅި އެ ގަރާރު ފާސްވީ މީގެ ކުރިއާ ހިލާފަށް މި ފަހަރު އެމެރިކާ އިން އެ ގަރާރު ވީޓޯ ނުކޮށް، ގަރާރު ފާސްކުރަން ނެގި ވޯޓުގައި ބައިވެރި ނުވުމުންނެވެ.
ސަލާމަތީ މަޖިލީހުގެ 14 މެމްބަރުން ތާއީދުކޮށްގެން ފާސްކުރި އެ ގަރާރު ހަމާސް އިން ރަހީނުކޮށްފައިވާ އިޒްރޭލުގެ އެންމެން އެއްވެސް ޝަރުތަކާނުލައި ދޫކޮށްލަން ވެސް ވަނީ ގޮވާލައިފަ އެވެ.
