ކުއްޖަކަށް އަނިޔާކުރި މައްސަލަ ބަލަން ހާއްސަ ޓީމެއް ރަސްދޫގައި

އއ. ރަސްދޫ މިސްކިތެއްގެ ފާހާނާ ތެރޭ ކުޑަކުއްޖަކަށް ގަނާކޮށް، އަނިޔާ ކުރި މައްސަލަ ބަލަން ސަރުކާރުގެ ކަމާ ގުޅުން ހުރި މުއައްސަސާތަކުގެ ޓީމެއް އެ ރަށަށް ގޮސްފި އެވެ.

ފުލުހުންގެ ތަރުޖަމާނު އަހުމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ ރަސްދޫގައި މި ވަގުތު ހަރަކާތްތެރިވަމުން ދަނީ ފުލުހުންގެ އިތުރުން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއާއި ޑިޕާޓްމަންޓް އޮފް ޖުވެނައިލް ޖަސްޓިސްގެ އޮފިޝަލުން ހިމެނޭ ޓީމެއް ކަމަށެވެ.

ސޯޝަލް މީޑިއާގައި ރޭ އާންމުވެފައިވާ ކުޑަކުއްޖާއަށް އަނިޔާކުރާ ވީޑިއޯއަކީ ކޮންއިރެއްގެ ވީޑިއޯއެއް ކަމެއް އަދި ސާފެއް ނުވެ އެވެ. ނަމަވެސް އެކަން ކޮށްފައިވަނީ ނަމާދު ކުރަމުންދިޔަ ވަގުތެއްގައިކަން ވީޑިއޯ އިން އިނގެ އެވެ.

ފުލުހުން ބުނި ގޮތުގައި އެކަމުގައި ބައިވެރިވީ 13 އަހަރުގެ ކުއްޖަކާއި 14 އަހަރުގެ ކުއްޖެކެވެ. އެ މައްސަލަ ސީރިއަސް މައްސަލައެއް ގޮތުގައި ބަލަމުންދާ ކަމަށްވެސް ފުލުހުން ރޭ ބުންޏެވެ.