ވޯޓު ފޮށިތައް ބަންދުކުރަން ފަށައިފި، 72 ޕަސަންޓް މީހުން ވޯޓުލި

މިއަދު ކުރިއަށްދިޔަ ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ކަނޑައަޅާފައިވާ ގަޑި ހަމަވެ، ބައެއް ފޮށިތަކުގެ ކިޔު ލައިންތަކާއި ފޮށިތައް ބަންދުކުރަން ފަށައިފިއެވެ.

މަޖިލިސް އިންތިހާބުގައި ވޯޓުލުން ފަށާފައިވަނީ 8:00 ޖެހިއިރުއެވެ. ވޯޓުލުން ކުރިއަށް ގެންދިޔައީ ހަވީރު 5:30 ހާ ހަމަޔަށެވެ. އެ ވަގުތަށްފަހު ވޯޓު ލެވޭނީ ވަގުތު ހަވަމުގެ ކުރިން ކިޔު ލައިނުގައި ތިބި މީހުންނަށް އެކަންޏެވެ.

އިލެކްޝަން ކޮމިޝަން (އީސީ)ން ބުނީ ވޯޓް ގުނަން ފަށާނީ ވޯޓް ފޮށި ބަންދުކުރާތާ 30 މިނެޓް ފަހުންނެވެ.

އީސީން ތަފާސްހިސާބުން ދައްކާ ގޮތުން 5:00 އާ ހަމައަށް 207,693 އަށް ވުރެ ގިނަ މީހުން ވޯޓުލައިފައި ވެ އެވެ. އެއީ ވޯޓުލުމުގެ ހައްގު ލިބިގެންވާ މީހުންގެ 72.96 ޕަސެންޓެވެ.