މޯލްޑިވްސް ވޭވްގެ ވެހިކަލް ސްކޭމްގައި ޖެހުނު އިތުރު މީހުން ތިބިތޯ ބަލަނީ

މެގަޓްރޯން މޮޓޯސް މޯލްޑިވްސް ވޭވް އިންޓަނޭޝަނަލް ނަމަކަށް ކިޔާ ކުންފުންޏަކުން ވެހިކަލް ގެނެސްދޭނެ ކަމަށް ބުނެ، މަކަރާއި ހީލަތުން އޮޅުވާލައިގެން ގިނަ ބައެއްގެ އަތުން ފައިސާ ހޯދި ސްކޭމްގައި ޖެހުނު އިތުރު މީހުން ތިބި ނަމަ، އެކަން އަންގަން އެދިއްޖެ އެވެ.

ގަޑި ވިއްކުމުގައި މަޝްހޫރުކަން ހޯދި މޯލްޑިވްސް ވޭވްގެ ކުންފުންޏެއް ކަމަށްވާ މެގަޓްރޯން މޮޓޯސް މޯލްޑިވްސް އިން ހިންގި ވެހިކަލް ސްކޭމްގެ މައްސަލައެއް މިދިޔަ މަހު ހުށަހެޅި އެ މައްސަލަ ބަލަމުންދާ ކަމަށް ފުލުހުން ހާމަކުރީވެސް މިދިޔަ މަހުގެ 14 ވަނަ ދުވަހު އެވެ.

ފުލުހުން މިއަދު ބުނީ، ނަމަކަށް ކިޔާ ކުންފުނިން ވެހިކަލް ގެނައުމުގެ ގޮތުން ފައިސާ ދައްކާފައިވާ އިތުރު ފަރާތެއްވާ ނަމަ، ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ނަންބަރު 9790048 އަށް ގުޅައި އެ މައުލޫމާތު މި މަހުގެ 30 ގެ ކުރިން ހިއްސާ ކުރުމަށް އެދޭ ކަމަށެވެ.