ރާއްޖެއަކީ މިސަރަހައްދުގެ އިންޑިއާގެ އަގުހުރި ބައިވެރިއެއް: މޯދީ

ރާއްޖެއަކީ އިންޑިއާގެ އަގުހުރި ބައިވެރިއެއް ކަމަށް، ތިން ވަނަ ދައުރަކަށް އިންޑިއާގެ ބޮޑުވަޒީރު ކަމަށް އިންތިހާބުވެވަޑައިގެންނެވި ނަރެންދުރަ މޯދީ މިއަދު ވިދާޅުވެއްޖެ އެވެ.

މޯދީ، އިންޑިއާގެ އާންމު އިންތިހާބު ކާމިޔާބު ކުރެއްވުމާ ގުޅިގެން ރައީސް ޑރ. މުހައްމަދު މުއިއްޒު ވަނީ ރޭ މަރުހަބާ ދަންނަވައިފަ އެވެ. ރައީސް މުއިއްޒުގެ ޕޯސްޓަށް ދެއްވަމުން މޯދީ މިއަދު ވިދާޅުވީ ރާއްޖެއަކީ، އިންޑިއާ ކަނޑުގެ ސަރަހައްދުގައި އަގުހުރި އަދި އަވަށްޓެރި ގައުމެއް ކަމަށެވެ.

ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށް އުއްމީދުކުރައްވާ ކަމަށް މޯދީ ވިދާޅުވި އެވެ.

އިންްޑިއާގައި ވޯޓު ގުނައި ނިމިފައިވާއިރު ބީޖޭޕީއަށް ލިބިފައިވަނީ 240 ގޮނޑި އެވެ. މޯދީއާ ވާދަކުރެއްވި ވަރްނާސީ ސިޓީގެ ދާއިރާއިން ކާމިޔާބު ހޯއްދެވުނީ 152،000 ވޯޓުގެ ތަފާތަކުންނެވެ.

ބީޖޭޕީއާއި އެ ޕާޓީއާ ގުޅިފައިވާ ޕާޓީތަކަށް ކުރި ލިބިފައިވަނީ 292 ގޮނޑިއާ އެކުގަ އެވެ. ސީދާ ބީޖޭޕީއަށް ކުރި ލިބިފައިވަނީ 240 ދާއިރާއަކުންނެވެ. ކުރިން އެ ޕާޓީއަށް އެކަނި 303 ދާއިރާ އޮތެވެ.

ކޮންގްރެސް އަށް ކުރިން 52 ދާއިރާ އޮތް ނަމަވެސް މިފަހަރު 99 ދާއިރާއެއް ވަނީ ލިބިފ ައެވެ.