މިދިޔަ ދެމަސް ތެރޭގައި 17 މިލިއަން ރުފިޔާގެ ޑްރަގްސް ވައިގެމަގުން އެތެރެކުރަން މަސައްކަތްކޮށްފި

ވައިގެ މަގުން ރާއްޖެއަށް އެތެރެކުރަން އުޅެނިކޮށް މިދިޔަ ދެ މަސް ދުވަހުގެ ތެރޭގައި 17 މިލިއަނަށް ވުރެ ގިނަ ރުފިޔާގެ މަސްތުވާތަކެތި އަތުލައިގަނެފި އެވެ.

މޯލްޑިވްސް ކަސްޓަމް ސާވިސް (އެމްސީއެސް)އިން މިއަދު ވަނީ މިދިޔަ ދެމަސް ދުވަހުގެ ތެރޭގައި އަތުލައިގަތް މަސްތުވާތަކެތީގެ ތަފާސްހިސާބުތައް އާންމުކޮށްފައެވެ.

ތަފާސްހިސާބުގައިވާ ގޮތުން ކަސްޓަމުން ވަނީ މިދިޔަ ދެމަސް ދުވަހުގެ ތެރޭގައި ވައިގެ މަގުން ރާއްޖެއަށް އެތެރެކުރަން އުޅުނު 7.8 ކިލޯގެ މަސްތުވާތަކެތި އަތުލައިގެންފަ އެވެ.

އެއީ 5،670 ގްރާމްގެ ކޮކެއިން، 1،690 ގްރާމްގެ ސިންތެޓިކް ކެތިނޯ، 300 ގްރާމްގެ ހެރޮއިން އަދި 180 ގްރާމްގެ ސިންތެޓީކް ކެތިނޯން ކަމަށް ކަސްޓަމުން ބުންނެވެ. އެ ތަކެތީގެ މަގުމަތީ އަގު 17.7 މިލިއަން ރުފިޔާ އަށް އަރާނެ ކަމަށް ކަސްޓަމުން ބުންޏެވެ.

އެ މަސްތުވާތަކެތި އަތުލައިގަނެފައިވަނީ ވައިގެ މަގުން ރާއްޖެ އައި ފަސިންޖަރުން އަދި ކުރިއަރު މެދުވެރިކޮށް ރާއްޖެއަށް ގެނެސްފައިވާ ޕާރުސަލުތައް ބަލައި ފާސްކުރުމުގެ ތެރޭގައި ޝައްކު ކުރެވޭ ޒާތުގެ ބާވަތްތައް ހުރުމުން އިތުރަށް ބަލައިފާސްކުރުމުގެ ތެރޭގައި ކަމަށް ކަސްޓަމުން ބުންޏެވެ.