ރޭ ހިންގި މާރާމާރީއާ ގުޅިގެން ހައްޔަރުކުރި މީހުން ތަހުގީގު ނިމެންދެން ބަންދަށް

ދަރުބާރުގެ ކައިރީގައި ރޭ ހިންގި މާރާމާރީއާ ގުޅިގެން ހައްޔަރުކުރި ހަތަރު މީހުން ތަހުގީގު ނިމެންދެން ބަންދުކޮށްފި އެވެ.

ދަރުބާރުގެ ކައިރީގައި ރޭ 10:30 އެހާކަންހާއިރު ހިންގި މާރާމާރީގައި އަނިޔާވި މީހަކަށް ސެނަހިޔާ ހޮސްޕިޓަލުގައި ފަރުވާ ދިން އިރު، އެ މައްސަލައާ ގުޅިގެން ދިވެހި ހަތަރު ފިރިހެނުން ވަނީ ހައްޔަރުކޮށްފަ އެވެ.

ފުލުހުން މިއަދު ބުނީ އެ މާރާމާރީގެ ތުހުމަތުގައި ހައްޔަރުކުރި މީހުންގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން އެންމެންވެސް ތަހުގީގު ނިމެންދެން ބަންދުކުރުމަށް އަމުރުކޮށްފައިވާ ކަމަށެވެ.

ރޭގެ މާރާމާރީއަށްފަހު މިއަދު މާލެއާއި ހުޅުމާލޭގައި އިތުރު މާރާމާރީއެއް ވަނީ ހިންގައިފަ އެވެ. އެ ދެ މާރާމާރީގައި ތިން މީހަކަށް ހަމަލާދީ ޒަހަމްކޮށްލި އިރު، ފުލުހަކަށްވެސް އަނިޔާވި އެވެ.

ފުލުސް މީހާއަށް އަނިޔާވީ ރޭ ފަތިހު ހުޅުމާލެ ފިލިގަސް މަގުގައި މާރާމާރީ ހިންގި މީހުން ފިލައިގެން ދާން މަސައްކަތް ކުރި ކާރު ހުއްޓުވަން މަސައްކަތް ކުރުމުން ކާރުން އައިސް ޖެއްސުމުންނެވެ. އެ ފުލުސް މީހާއަށް ހުޅުމާލޭ ހޮސްޕިޓަލުގައި ފަރުވާދިނުމަށް ފަހު މިހާރު ވަނީ ދޫކޮށްލައިފަ އެވެ.

ރޭ ހިންގި މާރާމާރީ އާއި މި ދެ މާރާމާރީއާ އެއްވެސް ގުޅުމެއް އޮތް ކަމެއް އަދި ނޭނގެ އެވެ.