އޭއެފްއެމްގެ މުވައްޒަފުން ވަކިކުރަން ޖެހުނީ ތަން ހުރި ބިން ހުސްކުރަން އެންގުމުން: އާރުޑީސީ

ވަޒީފާ އިން ވަކިކުރަން މެމޯ ފޮނުވީ އެ ކުންފުނިން ހިންގާ ވިޔަފާރިއެއްގެ ގޮތުގައި ބަލަހައްޓަމުންދިޔަ އެކޮމަޑޭޝަން ފެސިލިޓީ މެނޭޖްމަންޓް (އޭއެފްއެމް)ގެ މުވައްޒަފުންނަށް ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފި އެވެ.

އާރުޑީސީގެ މުވައްޒަފުންތަކެއް ވަޒީފާ އިން ވަކިކުރަން މެމޯއެއް ފޮނުވާފައިވާ ކަމަށް ބުނެ ބައެއް މީޑިއާތަކުގައި ޝާއިއު ކޮށްފައިވާ ހަބަރުގެ ތެދު މައުލޫމާތު ދެމުން އާރުޑީސީން ބުނީ، އޭއެފްއެމްގެ އިން ކުރަމުންދިޔަ ވިޔަފާރި ހުއްޓާލަން އެ ކުންފުނީގެ ބޯޑުން ނިންމީ އެ ވިޔަފާރިއަކީ ގެއްލުމުގައި ހިންގަމުންދިޔަ ވިޔަފާރިއަކަށް ވެފައި، އެ ވިޔަފާރި ކުރަމުންދިޔަ ބިން ދޫކޮށްލަން ޖެހުމުން ކަމަށެވެ.

އެ ބިން ދޫކޮށްލަން ޖެހުނު މައިގަނޑު ސަބަބަކީ އެ ފެސިލިޓީ ހިމެނޭ ސަރަހައްދަކީ ބޯހިޔާވަހިކަމުގެ މަޝްރޫގެ ދަށުން ރައްޔިތުންނަށް ގޯތި ދޫކޮށްފައިވާ ސަރަހައްދަކަށްވުމުންނާއި އެކަމާއި ގުޅިގެން ތަރައްގީގެ އެހެނިން މަޝްރޫއުތައް ހިންގުމަށް ހަމަޖެހިފައިވާ ސަރަހައްދަކަށްވުމުން، އެ ބިން ހުސްކުރުމަށް އެޗްޑީސީ އިން އެންގުމުން ކަމަށްވެސް އާރުޑީސީން ބުންޏެވެ.