ދައުލަތުގެ ހުރިހާ ކަމެއްގައި ޒުވާނުންނަށް ބަސް ބުނެވޭނެ، އެ އަޑު އަހާނަން: ރައީސް

ދައުލަތުގެ ހުރިހާ ކަމެއްގައި ޒުވާނުންނަށް ބަސް ބުނެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ދިވެހި ޒުވާނުންގެ ގައުމީ ލަފާދޭ ކޮމިޓީގެ ފުރަތަމަ ބައްދަލުވުމުގައި ބައިވެރިވެވަޑައިގެން ރައީސް ވިދާޅުވީ، ރާއްޖޭގެ އާބާދީގެ އެންމެ ބޮޑު އަދަދެއް ހިއްސާކުރާ ބަޔަކީ ޒުވާނުންނަށްވާއިރު، ދައުލަތް ހިންގުމާއި ބައްޓަން ކުރުމުގައި ބަސް ބުނެ، އެ މަނިކުފާނަށް ލަފާދޭނެ ކޮމިޓީއެއް އުފެދިގެން އައުމަކީ އުފާކުރައްވާ ކަމެއް ކަމަށެވެ.

”ޒުވާނުންގެ ކޮމިޓީއަށް އެއްވެސް ކަހަލަ ލިމިޓެއް، ވަކި ކަމެއްގައި ބަސް ނުބުނެވޭނެ ކަމެއް ނޯންނަ ގޮތަށް، ދައުލަތުގެ ހުރިހާ ކަމެއްގައި، ދިވެހިރާއްޖޭގެ އިމުގެ ތެރޭގައި ހިނގާ ކޮންމެ ކަމެއްގައިވެސް އަޅުގަނޑުގެ ގާނޫނީ ޒިންމާ އަދާކުރުމުގައި ތި ބޭފުޅުންނަށް ލަފާ ދެއްވޭނެ،“ ރައީސް ވިދާޅުވި އެވެ.

ރައީސް ވަނީ، އެ މަނިކުފާނު އެދިގެން ކަންކަން ކުރުމުގެ ބަދަލުގައި ޒުވާނުންނާ ގުޅޭ ކަންކަން އެންމެ ރަނގަޅަށް ކުރެވޭނެ ގޮތްތައް އެ މަނިކުފާނަށް ހުށަހެޅުމަށް ކޮމިޓީގައި އެދިވަޑައިގެންފައެވެ. އަދި ވަރަށް ފުޅާ ދާއިރާއެއްގައި މަސައްކަތް ކުރެއްވުމަށްވެސް އެދިވަޑައިގެންނެވިއެވެ.

”އަޅުގަނޑަށް ހުށަހަޅާ ކަންކަން އަޅުގަނޑު ބަލައިގަންނާނަމޭ ވީވަރަކުން ރާއްޖޭގައި އެކަންތައްތައް ތަންފީޒު ކުރުމަށް ކަންކަން ފަހިކުރާނަން. ލިމިޓޭޝަންގައިވެސް މަޝްވަރާ ކުރެވިގެން ދެން އޮންނަ އެންމެ ރަނގަޅު ގޮތެއްވެސް ހޯދިގެންދާނޭ،“ ރައީސް ވިދާޅުވިއެވެ.