ގޭންގު ކުށްތައް ހުއްޓުވުމުގެ ގޮތުން ގޭންގުތަކަށް މާލީ އެހީ ދިނުން ކުށަކަށް ހަދައި، ގޭންގު ކުށްތަކުން ހޯދާ މުދަލާއި ފައިސާ ދައުލަތަށް ނަގާ ގޮތަށް ހޯމް މިނިސްޓްރީން ބިލެއް ޑްރާފްޓެއް މިއަދު ބަންޑާރަ ނައިބުގެ އޮފީހަށް ފޮނުވައިފި އެވެ.
އެ ބިލުގެ ޑްރާފްޓުގައި ގޭންގުތަކާއި ގޭންގުތަކުގެ ލީޑަރުންނާއި މެންބަރުންނަކީ ކޮބައިކަން ކަނޑައަޅާފައިވެ އެވެ. އެގޮތުން ގޭންގެއްގެ ބައެއް ސިފަތައް ކަމަށް އެ ބިލުގައި ބުނެފައިވަނީ ވަކި ސިޓީއެއް، ރަށެއް، ގޯޅިއެއް އަދި ޕާކެއް ފަދަ ސަރަހައްދަކީ އެ ފަރާތެއްގެ ތަނެއް ކަމަށް ބެލެވޭނެ ގްރެފިޓީއެއް ނުވަތަ ނިޝާނެއް ކުރެހުން ނުވަތަ އެ ސަރަހައްދެއްގައި ގިނަ ވަގުތު ހޭދަ ކުރުމެވެ.
އަދި ބަޔަކު އާންމުކޮށް ގޮސް އުޅޭ ސަރަހައްދުގައި ގިނަ ވަގުތު ހޭދަ ކުރާ ބަޔަކަށް ކަން ކުރަންވީ ގޮތް ކިޔައިދޭ ބަޔަކު ތިބި ކަމަށް އެ މީހުންގެ މެދުގައި ގަބޫލު ކުރާކަން ފުލުހުންގެ ރެކޯޑުތަކުން ދެއްކުން ހިމެނެ އެވެ.
އެ ބިލުގައި ބުނެފައިވާ ގޮތުން، ގޭންގު މެންބަރެއްގެ ބައެއް ސިފަތަކުގެ ތެރޭގައި އޭނާއަކީ ގޭންގު މެންބަރެއް ކަމަށް އެއްބަސްވާ ފަރާތްތަކާއި ކުށް ކުރާ ގޭންގުތަކާ ގުޅިފައިވާ ޓެޓޫ ނުވަތަ ނިޝާނެއް ހުރުމާއި ގޭންގު ލީޑަރެއް ނުވަތަ މެންބަރެއްގެ ފަރާތުން މާއްދީ ފައިދާއެއް ލިބިފައިވާވުން ހިމެނެ އެވެ.
އަދި ގޭންގު ލީޑަރެއް ކަމަށް ބިލުގައި ބުނަނީ ބައެއް ކަންކަމުގެ ތެރޭގައި ގޭންގު ހަރަކާތް ހިންގުމަށް ބޭނުން ކުރާ ވަސީލަތްތަކާއި ކަންކަން މެނޭޖުކޮށް ބަލަހައްޓައި ވަކި އަމަލެއް ކުރަން ނުވަތަ ނުކުރަން ގޮތް ނިންމުމުގެ ބާރު ލިބިފައިވާ ފަރާތަކަށެވެ. ގޭންގެއްގެ އެހެން މެންބަރެއްގެ މައްޗަށް ބާރު ހިންގާ ފަރާތަކަށްވުމާއި އެ މީހަކީ ގޭންގެއްގެ ލީޑަރެއް ކަމަށް ފުލުހުންގެ ތަހުގީގަކަށް އެއްބަސްވެފައިވާ ފަރާތަކީ ވެސް ގޭންގު ލީޑަރެއް ކަމުގައި ބަލާނެ ކަމަށްވެސް ހިމަނައިފައިވެ އެވެ.
ބިލުގައި ބުނެފައިވާ ގޮތުން، ރަޖިސްޓްރީ ކޮށްފައިވާ ވިޔަފާރިއަކީ ގޭންގަކަށް ނުވަތަ ގޭންގު މެންބަރެއްގެ ނަމުގައިވާ އެއްޗެއް ކަމުގައި ނުވިޔަސް ބައެއް ހާލަތްތަކުގައި އެ ތަކެތި ހިފެހެއްޓުމުގެ ބާރު ފުލުހުންނަށް ދޭނެ އެވެ.
އެގޮތަށް ވިޔަފާރިއެއް ހިފެހެއްޓުމުގެ ބާރު ފުލުހުންނަށް ލިބޭނީ ވިޔަފާރި ކޮށްގެން ލިބޭ އާމްދަނީން ބައެއް ގޭންގަކަށް ނުވަތަ ލީޑަރަށް ލިބުމާއި ވިޔަފާރިން ލިބޭ އާމްދަނީން ޖިނާއީ ކުށްކުރުމަށް މަގުފަހިކުރުމަށް ބޭނުންކުރާކަމުގެ އިންޓެލިޖެންސް މައުލޫމާތު ލިބިފައިވާނަމަ ކަމަށް ވެސް ބުނެފައިވެ އެވެ.
އެ ޑްރާފްޓުގައި ކުށް ކޮށްގެން ލިބޭ މުދަލާއި ފައިސާ ދައުލަތަށް ނެގޭނެ ގޮތްތައް ވެސް ހިމަނާފައިފަ އެވެ. އަދި ގޭންގު ކުށްތަކުގައި ހައްޔަރުކުރާ މީހުންނަށް ގާނޫނުއަސާސީން ލިބިދީފައިވާ ހަނު ހުރުމުގެ ހައްގު ހަނި ކުރުމާއި ކަފާލާތުގެ ދަށުން ދޫނުކުރެވުމާއި ޕޭރޯލްގެ ދަށުން ދޫ ނުކުރެވުމާއި މައާފު ނުވަތަ އަދަބު ލުއި ކޮށް ނުދެވޭނެ ކަމަށް ވެސް ބުނެފައިވެ އެވެ.
ތަންފީޒީ އިދާރަތަކަށް ލިބިދޭ ބާރުތައް:
- ގޭންގު ހަރަކާތެއް ހިންގުމަށް އުޅަނދެއް ބޭނުން ކޮށްފި ނަމަ ކޯޓު އަމުރަކާ ނުލައި 90 ދުވަހުގެ މުއްދަތަކަށް ހިފެހެއްޓުމުގެ ބާރު.
- ގޭންގެގައި ހިމެނޭ ފަރާތެއް ކުށެއް ކޮށްފާނެ ކަމަށް ބުއްދި އަށް ގަބޫލު ކުރެވޭ އެކަށީގެންވާ ސަބަބު ހުރެއްޖެ ނަމަ ކޯޓު އަމުރަކާ ނުލައި އެ މީހުން ހައްޔަރު ކުރުމުގެ ބާރު.
- ކޯޓު އަމުރަކާ ނުލައި މީހުން ބަލާ ފާސް ކުރުމާއި އެ މީހުންގެ ފޮޓޯ ނެގުމުގެ ބާރު.
- އަމިއްލަ ތަނަކުން ހައްޔަރު ކުރާ ފަރާތްތައް ހުރި ތަނެއްގައި ކުށަކާ ގުޅޭ ހެކި ހުރި ކަމަށް ގަބޫލު ކުރެވޭ ނަމަ ބަލާ ފާސް ކުރުމުގެ ބާރު.
33 Comments
ގުޅުންހުރި
ކުރީ ސަރުކާރުން ބަދަލު ދީފައި ހުރީ ގާނޫނާ ހިލާފަށް، އެ ނިންމުންތައް
ޑޮލަރުން އާމްދަނީ ލިބޭ ކުންފުނިތަކުން ޓެކްސްއާއި ޕެންޝަން ޑޮލަރުން ދޭން ޖެހޭ
އައިޖީއެމްއެޗްގެ އިހުމާލުން ދަރިފުޅު މަރުވުމުން މަންމަ ބޭނުންވީ މާލީ ބަދަލު، ދައުލަތުން
ކަސްޓަމުން ވަކިކޮށް ސްޓޭޓް މިނިސްޓަރުކަން ދިންތާ ދެ ދުވަސްފަހުން މާނިއު އިސްތިއުފާ
ިއިބޫގެ ޔޫއެން ދަތުރު: އަޒާން ނުރުހުން ފާޅުކޮށްފައި ވަނިކޮށް އޭޖީގެ ނިންމުން
ފުލުހުންނަށްވެސް ޑްރޯންތަކެއް، ލިބުނީ ކަނޑާއި ވައިގެ ތެރޭގައި ދުއްވާ 2 ޑްރޯން