ފުލުހުންގެ އިލްތިމާސް: ބުރިޖުން ދަތުރުކުރާއި ކުޑަ ނުނެގުން، ފަސޭހައިން ހަލާކުވާ ކޯޓު ނުލުން

މި ދުވަސްވަރަކީ މޫސުން ގޯސްވެ ގަދައަށް ވައިޖެހި ވިއްސާރަވަމުންދާ ދުވަސްވަރަކަށްވާތީ ސިނަމާލެ ބުރިޖާއި ހައިވޭމަތިން ދަތުރުކުރާއިރު ކުޑަ ނުނެގުމަށާއި ފަސޭހައިން ހަލާކުވާ ކަހަލަ ކޯޓު ލައިގެން ދަތުރުނުކުރުމަށް ފުލުހުން އިލްތިމާސްކޮށްފި އެވެ.

ފުލުހުން މިއަދު އެކްސްގައި ކުރި ޕޯސްޓެއްގައި ވަނީ ހެލްމެޓްވެސް ވަޔާ ނުދާނޭހެން ރަނގަޅަށް އެޅުމަށާއި އުޅަނދުގެ ލައިޓުތައް ދިއްލޭތޯ ބަލައި ސަލާމަތާއި ރައްކާތެރިކަން ކަށަވަރު ކޮށްގެން އުޅަނދު ދުއްވުމަށްވެސް އިލްތިމާސްކޮށްފަ އެވެ.

އޭގެ އިތުރުން ބުރިޖާއި ހައިވޭއިން ދަތުރުކުރާއިރު ތިމާއާއި އަނެކުންގެ ސަލާމަތާއި ރައްކާތެރިކަމަށް ބަލައިގެން އުޅަނދު ދުއްވުމަށް ވެސް ފުލުހުން އިލްތިމާސް ކުރެ އެވެ.

މެޓް އޮފީހުން އިއްޔެ ނެރުނު މޫސުމާބެހޭ ރިޕޯޓުގައި ބުނެފައިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ ރާއްޖެއެއާ ދުރުން އުތުރާއި ދެކުނުގައި ދެކޮޅިގަނޑު އުފެދިފައިވާ ކަމަށެވެ.

ހޯމަ ދުވަހާ ހަމައަށް ރާއްޖެއަށް މޫސުން ވަރަށް ގޯސްވާނެ ކަމަށް މެޓުން ބުނެފައިވެއެވެ. އުތުރާއި މެދުރާއްޖޭތެރޭގެ އަތޮޅުތަކުގައި އެވްރެޖުކޮށް ގަޑިއަކު 15 މޭލާއި 25 މޭލާދެމެދު ވައިޖެހި ބޮޑު ބަޔަކަށް ގަދަވަޔާއެކު ވިއްސާރަކޮށް ގުގުރާނެ ކަމަށެވެ. އަދި ދެކުނުގެ އަތޮޅުތަކުގައި އެވްރެޖުކޮށް ގަޑިއަކު 10 މޭލާއި 20 މޭލާދެމެދުގެ ބާރުމިނުގައި ވައިޖެހޭނެ ކަމަށް ބެލެވޭ ކަމަށާއި ބައެއް އަތޮޅުތަކަށް ގަދަވަޔާއެކު ވިއްސާރަކުރާނެ ކަމަށް ބެލެވޭ ކަމަށް މެޓުން ބުނެފައިވެ އެވެ.

ވިލާގަނޑުގައި ހުރިހާ ހިސާބަކަށް ވެސް 45 މޭލާއި 55 މޭލަށް ވައިގަދަވުން އެކަށީގެންވާ ކަމަށް މެޓުން ބުނެފައިވެ އެވެ. ރާއްޖޭގެ ބޮޑުބަޔަކަށް ގަދަވަޔާއެކު ގުގުރައި އާއްމުކޮށް އުދައަރާ ސަރަހައްދުތަކަށް ދިޔަވަރު ބޮޑުވާ ވަގުތުގައި އުދަ އެރުން އެކަށީގެންވާ ކަމަށް މެޓުން ބުނެފައިވެ އެވެ.

”ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ ރާއްޖެއާ ދުރުން އުތުރާއި ދެކުނުގައި ދެކޮޅިގަނޑު އުފެދިފައިވެ އެވެ. ވޭތުވެދިޔަ ހަތަރުދުވަހު އުތުރާއި މެދުރާއްޖޭތެރޭގެ ސަރަހައްދަށް އާއްމުވައި ގަދަވެ، ވިލާގަނޑުގައި ވައި ވަރަށް ގަދަވެފައިވެ އެވެ“ މެޓުން ބުނެފައިވެއެވެ.

އެގޮތުން ދަރަވަންދޫގައި އިއްޔެ ވަނީ 55 މޭލުބާރުމިނުގައި ވައިޖެހިފައި ކަމަށް މެޓުން ބުންޏެވެ. ހުޅުލެއަށް މިއަދު ވަނީ 58 މޭލާއި 61 މޭލު ބާރުމިނުގައި ވައިޖެހިފައި ކަމަށް މެޓުން ބުންޏެވެ.

މިހާރު ކުރަމުންދާ ވިއްސާރައިގައި އެންމެ ބޯކޮށް ވާރޭވެހިފައިވަނީ މިދިޔަ އަންގާރަ ދުވަހު ފުވައްމުލަކު ސިޓީއަށް ކަމަށް މެޓުން ބުންޏެވެ. އެ ސިޓީއަށް ވަނީ 180 މިލިމީޓަރުގެ ވާރޭވެހިފައި ކަމަށް މެޓުން ބުންޏެވެ.

ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކުރާ ކަމަށް މެޓުން ބުންޏެވެ.