ދިވެހި ސިފައިންގެ އަތަށް ޑޯނިއާ ދުއްވަން ނުދޭ ސަބަބުން ސިއްރުކުރަން ޑިފެންސުން ހައި ކޯޓަށް!

އިންޑިއާއިން ރާއްޖެއަށް ހަދިޔާކޮށްފައިވާ ޑޯނިއާ މަތިންދާބޯޓުތައް ދުއްވުމުގެ ހުއްދަ ތަމްރީނު ހެދި ސިފައިންނަށް ނުދޭ ސަބަބުން ސިއްރުކުރަން ނުވަތަ ހާމަނުކުރަން، ޑިފެންސް މިނިސްޓްރީން ހައި ކޯޓަށް މައްސަލަ ހުށަހަޅައިފި އެވެ.

ރާއްޖެއިން ވަނީ ޑޯނިއޯ ދުއްވުމުގެ ގޮތުން އެމްއެންޑީއެގް ދެ އޮފިސަރަކު ތަމްރީނުކޮށްފަ އެވެ. އެއީ ސިފައިންގެ ފަސްޓް ލެފްޓިނެންޓް އިބްރާހިމް ޝަރީފާއި ލެފްޓިނެންޓް އަހުމަދު އަލީ އެވެ.

އޭގެ އިތުރުން ފަސް ޕައިލެޓެއް އަސްކަރީ އުޅަނދުތައް ދުއްވަން ތަމްރީނުކޮށް ހަތަރު ޕައިލެޓަކު ޑޯނިއާ ކޮންވާޝަން ކޯސް ފުރިހަމަކޮށްފައިވާ ކަމަށް ވެސް އެމްއެންޑީއެފުން ކުރިން ބުނެފައިވެ އެވެ.

ރާއްޖެއަށް، އިންޑިއާއިން ހަދިޔާކޮށްފައިވާ ޑޯނިއާ ދުއްވަމުން އައިސްފައިވަނީ އިންޑިއާ ސިފައިންނެވެ. ނަމަވެސް މިހާރު ޑޯނިއޯތައް އޮޕަރޭޓް ކުތަނީ އިންޑިއާގެ މަދަނީ މީހުންނެވެ.

ދިވެހި ސިފައިން ޑޯނިއޯ އޮޕަރޭޓް ކުރިތޯ ސާފުކުރުމުގެ ގޮތުން ”މިހާރު“ ނޫހުން ވަނީ މައުލޫމާތު ހޯދައި ލިބިގަތުމުގެ ހައްގުގެ ދަށުން އެ މައުލޫމާތު ހޯދުމަށް ޑިފެންސް މިނިސްޓްރީގައި އެދިފަ އެވެ. އަދި ވަނީ އެ ދެ ސިފައިންގެ އޮފިސަރުން ވަޒީފާއިން ވަކިވި ސަބަބު ސާފުކޮށްދިނުމަށް ވެސް އެދިފަ އެވެ.

ނަމަވެސް ގައުމީ ސަލާމަތައް ނުރައްކާވެދާނެ ކަމަށް ބުނެ ޑިފެންސް މިނިސްޓްރީން ވަނީ އެ މައުލޫމާތު ހާމަކުރުމަށް ދެކޮޅު ހަދައިފަ އެވެ. ޑިފެންސުން އެގޮތަށް ނިންމީ މައުލޫމާތު ހޯދައި ލިބިގަތުމުގެ ގާނޫނުގެ 29 ވަނަ މާއްދާއަށް ރިއާޔަތްކޮށެވެ.

އެ މާއްދާގައި ބުނާ ގޮތުން ގައުމީ ސަލާމަތަށް ނުރައްކާވެދާނެ ފަދަ މައުލޫމާތު ސިއްރު ކުރުމުގެ ފުރުސަތު އޮންނާނެ އެވެ. ނަމަވެސް އެ މައުލޫމާތު ހާމަކޮށްގެން ގައުމީ ސަލާމަތަށް ނުރައްކާވެދާނެ ފަދަ ކަމެއް ހިމެނިގެން ނުވާ ނަމަ އެ މާއްދާ ނުހިނގާނެ ކަމަށް ވެސް ގާނޫނުގައި ބުނެފައިވެ އެވެ.

ޑިފެންސް މިނިސްޓްރީގެ އެ ނިންމުމާ ގުޅިގެން އިންފޮމޭޝަން ކޮމިޝަނަރު އޮފީހުން ވަނީ ހަތަރު އަޑުއެހުމެއް ބާއްވައިފަ އެވެ. އެ އަޑުއެހުންތަކަށްފަހު އިންފޮމޭޝަން ކޮމިޝަނަރު އޮފީހުން ނިންމީ ”މިހާރު“ ނޫހުން އެދުނު މައުލޫމާތުތައް ފަސް ދުވަހުގެ ތެރޭގައި ހާމަކުރުމަށެވެ.

ނަމަވެސް އިންފޮމޭޝަން ކޮމިޝަނަރުގެ އެ ނިންމުން ޑިފެންސް މިނިސްޓްރީގެ ފަރާތުން ވަނީ މިދިޔަ އަންގާރަ ދުވަހު ހައި ކޯޓުގައި އިސްތުއުނާފުކޮށްފަ އެވެ.