ރާއްޖޭގެ ތާރީހުގައި ހިންގާ އެންމެ ބޮޑު ހަކަތައިގެ މަޝްރޫއު ޗައިނާގެ ކުންފުންޏަކަށް

ހަކަތައިގެ ސިނާއަތުގައި ރާއްޖޭގައި މިހާތަނަށް ހިންގޭ އެންމެ ބިޔަ އަދި ބޮޑު މަޝްރޫއު ޗައިނާގެ ކުންފުންޏަކާ ހަވާލުކޮށްފި އެވެ.

ތިލަފުށީގައި 150 މެގަވޯޓުގެ ’ޑުއަލް ފިއުލް‘ ޕަވަ ޕްލާންޓެއް އެޅުމާއި މާލެއިން ތިލަފުއްޓާ ހަމައަށް އިންޓަކަނެކްޝަން ޓްރާންސްމިިޝަން ލައިނެއް އެޅުމަށް ހަވާލުކުރީ ޗައިނާގެ ޓީބީއީއޭ ގްރޫޕް ކޯ ލިމިޓެޑް ކުންފުންޏާ އެވެ.

އެ އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ އެވެ. ޓީބީއީއޭ ގްރޫޕްގެ ފަރާތުން ސޮއިކުރެއްވީ އެ ކުންފުނީގެ ބާނީ ޒަންގް ޝިން އެވެ.

އެ އެއްބަސްވުމާއި ގުޅޭ ގޮތުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ މިއީ ރާއްޖޭގެ ހަކަތައިގެ ސިނާއަތުގެ ފެންވަރު ރަނގަޅުކުރަން ކުރިއަށް އެޅޭ މުހިންމު ފިޔަވަޅެއް ކަމަށެވެ.