ވޭމަންޑޫގައި ދައުލަތުން ބަލަހައްޓާ ކުދިން އެހެން ރަށަކަށް ބަދަލުކޮށްފި

ދައުލަތުގެ ބެލުމުގެ ދަށުން ތ. ވޭމަންޑޫގައި ބަލަހައްޓަމުން އައި ހުރިހާ ކުދިން އެހެން ރަށަކަށް ބަދަލުކޮށްފި އެވެ.

ވޭމަންޑޫގައި ހުންނަ ެމިލީ އެންޑް ޗިލްޑްރެންސް ސާވިސް ސެންޓަރު (އެފްސީއެސްސީ) ހުރި އަންހެން ކުއްޖަކު، އެ ސެންޓަރުގައި މަސައްކަތްކުރާ މުވައްޒަފަކަށް ހަމަލާދިން މައްސަލައެއް ދާދިފަހުން ވަނީ ފެންމަތިވެފަ އެވެ.

އެ މައްސަލައާ ގުޅިގެން ވޭމަންޑޫ ރައްޔިތުން ވަނީ މުޒާހަރާ ވެސް ކޮށްފަ އެވެ. އެ ރަށު މީހުން މުޒާހަރާކުރީ އެ އަންހެން ކުއްޖާ އެހެން ރަށަކަށް ބަދަލުކުރުމަށް ގޮވާލަ އެވެ.

އެނގިފައިވާ ގޮތުގައި ޖެންޑާ މިނިސްޓްރީން މިހާރު ވަނީ ވޭމަންޑޫގައި ހުންނަ އެފްސީއެސްސީގައި ތިބި ހުރިހާ ކުދިން އެހެން ރަށަކަށް ބަދަލުކޮށްފަ އެވެ.

ވޭމަންޑޫއަށް އެ އަންހެން ކުއްޖާ ގެންގޮސްފައިވަނީ މީގެ ނުވަމަސް ކުރިންނެވެ. އެ ރަށު މީހުން ވަނީ އެ ކުއްޖާއާ ގުޅޭ އެހެން މައްސަލަތަކެއް ވެސް މީގެ ކުރިން ކައުންސިލަށާއި ޖެންޑާ މިނިސްޓްރީއަށް ހުށަހަޅައިފަ އެވެ.

އެ ރަށު މީހުން އިތުރަށް އެ އަންހެން ކުއްޖާ ރަށުގައި ބަހައްޓަން ބޭނުންނުވާތީ ޖެންޑާ މިނިސްޓްރީން އެ އަންހެން ކުއްޖާ ހިމެނޭހެން އެހެން ހުރިހާ ކުދިން ވެސް ވަނީ ބަދަލުކޮށްފަ އެވެ.