ހަނގުރާމައިގެ މައިދާނުގައި ދުޝްމަނުންނާ ހަނގުރާމަކުރަނިކޮށް، އެ މައިދާނުގައި ޝަހީދުވާ މީހުންގެ މައްޗަށް ކަށުނަމާދުކުރުން ނޯންނަ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ފަލަސްތީނުގެ މިނިވަންކަމަށް މަސައްކަތްކުރާ މުޖާހިދުންގެ ވެރިންގެ މައްޗަށް އިސްލާމީ ބޮޑެތި ގައުމުތައް ކަމަށްވާ ތުރުކީ، ބަންގްލަދޭޝް އަދި ޕާކިސްތާން ފަދަ ގައުމުތަކުގައި ކަށުނަމާދު ކުރި ނަމަވެސް ރާއްޖޭގައި ކަށުނަމާދު ނުކުރާތީ ފާޑުކިޔުންތައް ދަނީ އަމާޒުވަމުންނެވެ.
އެގޮތުން މިދިޔަ ޖުލައި މަހުގެ ތެރޭގައި އަވަހާރަކޮށްލި ހަމާސްގެ ލީޑަރު އިސްމާއިލް ހަނިއްޔާ އާއި އޭނާގެ ފަހުން އެ ޖަމާއަތުގެ ވެރިއަކަށް ހަމަޖައްސާފައި ހުއްޓައި މިދިޔަ ބުދަ ދުވަހު އަވަހާރަކޮށްލި ޔަހްޔާ ސިންވާރުގެ މައްޗަށްވެސް ރާއްޖޭގައި ކަށުނަމާދު ކޮށްފައެއް ނުވެ އެވެ.
އަމިއްލަ ފޭސްބުކް އެކައުންޓުގައި ޝަހީމު މިއަދު ކުރެއްވި ޕޯސްޓެއްގައި ވިދާޅުވި ގޮތުގައި އިސްލާމްދީނުގެ ޖުމުހޫރު އިލްމުވެރިން ދެކެވަޑައިގަންނަވާ ގޮތުގައި ހަނގުރާމައިގެ މައިދާނުގައި ދުޝްމަނުންނާ ހަނގުރާމަކުރަނިކޮށް މައިދާނުގައި ޝަހީދުވާ މީހުންގެ މައްޗަށް ކަށު ނަމާދު ކުރުމެއް ނޯވެ އެވެ. އެގޮތަށް ކަށު ނަމާދު ކުރެވިދާނެ ކަމަށް ދެކެނީ ވަރަށް މަދު އިލްމުވެރިއެއް ކަމަށާއި ޖާއިޒުކަމަށް ދެކޭ އިލްމުވެރިންވެސް އެއީ ވާޖިބު ކަމެއް ނޫން ކަމަށް ވިދާޅުވާ ކަމަށެވެ.
ޝަހީމު ވިދާޅުވީ ދީނުގެ ކަންކަމުގައި އަމަލުކުރަންވާނީ ދީނުގައި އޮންނަ ރަނގަޅު ގޮތަށް އަދި ކީރިތި ރަސޫލާގެ ސައްހަ ސުންނަތުގައި އޮންނަ ގޮތަށް ކަމަށެވެ.
”އުހުދު ހަނގުރާމައިގައި ޝަހީދުވި މާތް ސަހާބީންގެ މައްޗަށް ކީރިތި ރަސޫލާ ކަށުނަމާދު ކުރައްވާފައި ނުވެއެވެ. އެ ހަނގުރާމައިގައި އެ ކަލޭގެފާނުގެ މާތް ބޮޑު ބޭބޭފުޅު ހަމްޒަތުގެފާނުގެވެސް ޝަހީދުވެވަޑައިގެންނެވި އެވެ. ހަމްޒަތުގެފާނުގެ މައްޗަށްވެސް، އެހެން ބޭކަލެއްގެ މައްޗަށްވެސް ވަޅުލުމުގެ ކުރިން ކަށު ނަމާދުކުރައްވާފައި ނުވެއެވެ. ޝަހީދުން ވަޅުލަނީ ނުހިނަވައި އެ މީހުންގެ ލެއާއެކުގައެވެ. ޝަހީދުންގެ މައްޗަށް ކަށު ނަމާދު ކުރުމެއް ނެތެވެ. ޝަހީދުންނަކީ މަރުވިޔަސް، ދިރި ތިބި ބައެކެވެ. ޝަހީދުންގެ މައްޗަށް އޮތީ ހެޔޮ ދުއާކުރުމެވެ.“ ޝަހީމު ވިދާޅުވި އެވެ.

ގުޅުންހުރި
އަމިއްލަ އަމިއްލައަށް ރޯދަ އާއި އީދު އިއުލާން ނުކުރުމަށް ޝަހީމް އިލްތިމާސް
މި ރޯދަ މަހުވެސް ޝަހީމް އިމާމުވެ ތަރާވީހު ނަމާދު ކުރައްވާނީ ހުޅުމާލޭ
އިސްލާމީ މަރުކަޒުގައި އިމާމުވެ ތަރާވީސް ނަމާދު ކުރާނީ ޒުވާން ހަތަރު ހާފިޒުން
ރައީސްގެ ނިންމެވުމެއް: ގައުމީ ގުރުއާން މުބާރާތަށް ހަރަދުކުރާނީ ސީދާ ދައުލަތުގެ ބަޖެޓުން!
އުމްރާ މީހުން ގެންދިޔުމުގެ އުސޫލާ ހިލާފުވި 19 ކުންފުންޏެއް 5،000 ރުފިޔާއިން
ބަރުބަރީ މިސްކިތް ތަޅާލައި އެ ބިމުގައި ތިން ބުރީގެ އާ މިސްކިތެއް