އިހުސާން ވިދާޅުވީ ތައްޔާރީތައް ނިމުނުހާ އަވަހަކަށް މަރުގެ ހުކުމް ތަންފީޒު ކުރާނެ ކަމަށް

މަރުގެ ހުކުމް ތަންފީޒު ކުރަން ވާންޖެހޭ ތައްޔާރީތައް ވަމުން އަންނަ ކަމަށާއި އެކަން ނިމުނުހާ އަވަހަކަށް ރާއްޖޭގައި މަރުގެ ހުކުމް ތަންފީޒު ކުރާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

މި ސަރުކާރުން މަރުގެ ހުކުމް ތަންފީޒު ކުރާނެކަން އިއުލާން ކުރެއްވީވެސް އިހުސާނެވެ. އެއީ މީގެ 10 މަސް ކުރިން 20 ޑިސެމްބަރު 2023ގަ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ މަރުގެ ހުކުމް ތަންފީޒު ކުރުމުގެ ކުރިން އެކަމަށް ބޭނުންވާ ތަން ތައްޔާރުކުރުމާއި މީހުން ތަމްރީން ކުރުމުގެ އިތުރުން އެކަމަށް ހަދަންޖެހޭ އުސޫލުތަކާއި ގަވާއިދުތަކެއް އެބަހުރި ކަމަށެވެ.

”އަޅުގަނޑަށް ޔަގީންކަން ދޭން ކެރިދާނެ މިހާރު އިއުލާންކޮށްފައިވާ ގޮތަށް އެކަން ކުރާނަން ދިވެހިރާއްޖޭގައި. އަޅުގަނޑުމެންގެ ޓާގެޓަކީ މި ދައުރެއް ނޫން، މި މަސައްކަތް ނިމޭހާ އަވަހަކަށް، ވީ އެންމެ އަވަހަކަށް ފެށުން،“ އިހުސާން ވިދާޅުވި އެވެ.

ރާއްޖޭގައި އެންމެ ފަހުން މަރުގެ ހުކުމެއް ތަންފީޒު ކުރީ މީގެ 70 އަހަރު ކުރިން 1953 ވަނަ އަހަރެވެ. އެ ފަހަރު މަރުގެ ހުކުމް ތަންފީޒުކުރީ ސިހުރު ހަދައި، ވިހަ ހިކައެއް ލައިގެން ސައި ކައްކައި ހުވަދު އަތޮޅު އަތޮޅުވެރިޔާ ވީރު އަލިދީދީ އަށް އެރުވި ކަމުގެ ކުށް ސާބިތުވި ހަކީމް ދީދީގެ މައްޗަށެވެ.