ޑޮލަރު ގަވާއިދުގެ ދަށުން އެންމެ ރިސޯޓެއް ފިޔަވައި ހުރިހާ ރިސޯޓަކުން ރަޖިސްޓްރީވެއްޖެ

ރިސޯޓްތަކަށް ލިބޭ ޑޮލަރު ބޭންކްތަކުން މާރުކުރަންޖެހޭ ގޮތަށް ހެދި ގަވާއިދުގެ ދަށުން، މިހާތަނަށް 173 ރިސޯޓަކުން ރަޖިސްޓްރީވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ން ބުނެފި އެވެ.

އެމްއެމްއޭއިން މިއަދު ބުނީ ރާއްޖޭގައި ހިންގަނީ 174 ރިސޯޓު ކަމަށެވެ. ބޭރު ފައިސާގެ ގަވާއިދުގެ ދަށުން ރަޖިސްޓްރީވެފައިނުވަނީ އެންމެ ރިސޯޓެއް ކަމަށެވެ.

ބޭރު ފައިސާޣެ ގަވާއިދަށް އަމަލުކުރަން ފަށައިފައިވަނީ މިދިޔަ މަހުގެ އެއްވަނަ ދުވަހުު ފެށިގެންނެވެ. އޭގެ ފަހުން ޓީޖީއެސްޓީއަށް ރަޖިސްޓްރީވާ ފަރާތެއްނަމަ އެ ފަރާތްތަކަށް ރަޖިސްޓަރީ ވުމަށް 30 ދުވަހުގެ މުއްދަތެއް އެމްއެމްއޭއިން ވަނީ ދީފަ އެވެ

އެ ގަވާއިދުގައިވާ ގޮތުން ގަވާއިދުގެ ދަށުން ރަޖިސްޓްރީވާން ޖެހެނީ، އެމްއެމްއޭއިން އެކަމަށް ހާއްސަކޮށްފައިވާ ޕޯޓަލެއްގަ އެވެ. އެ ޕޯޓަލްގައި ރިސޯޓުތަކުގެ މައުލޫމާތުތައް ހިމަނަން ޖެހޭނެ އެވެ.

އެމްއެމްއޭ އިން ބުނީ ގަވާއިދާ ގުޅިގެން ބައެއް ރިސޯޓުތަކުން ޝަކުވާ ހުށަހަޅާފައިވާ ކަމަށެވެ. ނަމަވެސް، އަދި ޝަކުވާ ހުށަހެޅި ރިސޯޓުތަކުގެ އަދަދު ސާފެއް ނުވެ އެވެ.

ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.

ކެޓަގަރީ ”އޭ“ ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. އަދި ކެޓަގަރީ ”ބީ“ ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

އެ ގަވާއިދުގެ ދަށުން ޑޮލަރު މާރުކުރަން ފަށަން ޖެހޭނީ އަންނަ ޖެނުއަރީ މަހުގެ ފަހުކޮޅުން ފެށިގެންނެވެ.