ލިސްޓު ނެރުން ފަސްކުރިޔަސް މަގުސަދަކީ ހައްގުވެރިންނަށް ފްލެޓް ދިނުން: ސަރުކާރު

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރިއަށްގެންދިޔަ ’ގެދޮރުވެރިޔާ‘ ސްކީމުގެ ދަށުން ފުލެޓް ލިބުނު ފަރާތްތަކުގެ ވަގުތީ ލިސްޓު ނެރުން މުއްދަތެއް ނެތް ގޮތަށް ފަސްކުރި ނަމަވެސް ފްލެޓް ދޭނީ ހައްގުވެރިންނަށް ކަމަށް ސަރުކާރުން ބުނެފި އެވެ.

މާލެ ސަރަހައްދުން ފްލެޓް ދޫކުރުމަށްޓަކައި 26 ޖޫން 2022 ގައި ފެށި ގެދޮރުވެރިޔާ ސްކީމުގެ ދަށުން ފްލެޓް ލިބޭ މީހުންގެ ދާއިމީ ލިސްޓެއް ރައީސް ސޯލިހުގެ ސަރުކާރު ނިމެން ދެ ދުވަހަށް ވެފައިވަނިކޮށް، 15 ނޮވެމްބަރު 2023 ގައި ނެރުނެވެ. ނަމަވެސް ފްލެޓް ލިސްޓު އެކުލަވައިލުމުގައި ކޮރަޕްޝަނަަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް، އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅި މައްސަލައަކާ ގުޅިގެން ފްލެޓް ދޫކުރުން އެ ކޮމިޝަނުން ހުއްޓުވި އެވެ.

އޭގެ ގާތްގަނޑަކަށް ދެ މަސް ދުވަހުގެ ތަހުގީގަކަށްފަހު އޭސީސީން ބުނީ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ. އެހެންވެ މި ސަރުކާރުން ވަނީ އާ ފްލެޓް ކޮމިޓީއެއް ހަދައި، އެ ލިސްޓު މުރާޖައާ ކުރުމުގެ މަސައްކަތް ފެށި އެވެ.

އެގޮތުން ގެދޮރުވެރިޔާ ސްކީމަށް ޝަރުތު ހަމަވާ މީހުންނަށް ފްލެޓް ދޫކުރުމުގެ މަސައްކަތް ޖޫން މަހުގެ ތެރޭގައި ފަށާނެ ކަމަށް މި ސަރުކާރުގެ ހައުސިން މިނިސްޓަރު ޑރ. އަލީ ހައިދަރު ވިދާޅުވި އެވެ. ނަމަވެސް އެ މުއްދަތަށްވެސް އެކަން ނުކުރެވުމުން ފަހުން ވިދާޅުވީ މި އަހަރުގެ އޮގަސްޓް މަހު ލިސްޓު އާންމު ކުރައްވާނެ ކަމަށެވެ.

އެ މުއްދަތަށްވެސް އެކަމެއް ނުވި އެވެ. އެހެންވެ ދެން ވިދާޅުވީ މިދިޔަ ހަފުތާގައި ފްލެޓް ލިބުނު މީހުންގެ ދާއިމީ ލިސްޓެ ނެރެ އެއަށް ޝަކުވާ ހުށަހުމުގެ ފުރުސަތު ހުޅުވާލާނެ ކަމަށެވެ. ނަމަވެސް އެ މުއްދަތުގައިވެސް ލިސްޓެއް ނުނެރެވޭނެކަން ޔަގީންވުމުން މިދިޔަ ބުރާސްފަތި ދުވަހު ބޭއްވި ނިއުސް ކޮންފަރެންސްއެއްގައި ހައިދަރު ވިދާޅުވީ މިއަދު ލިސްޓް އިއުލާން ކުރައްވާނެ ކަމަށެވެ.

ނަމަވެސް ހައުސިން މިނިސްޓްރީން މިއަދު ނެރުނު ނޫސްބަޔާނެއްގައި ވަނީ، ގެދޮރުވެރިޔާ ސްކީމުގެ އުސޫލުގެ ދަށުން ހުށަހަޅާފައިވާ 20،697 އެޕްލިކޭޝަން ފޯމް ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމާއި ގުޅިގެން އެ މަސައްކަތްތައް ނިންމުމަށް އިތުރު މުއްދަތު ބޭނުންވާ ކަމަށެވެ. އެހެންވެ އެ ސްކީމުގެ ވަގުތީ ލިސްޓާއި ރީ އިވެލުއޭޝަންއާ ގުޅިގެން ކުރިއަށްގެންދިޔަ މަސައްކަތްތަކުގެ ތަފުސީލުތައް މި މަސައްކަތްތައް ނިމުނުހާ އަވަހަކަށް އާންމު ކުރާނެ ކަމަށް ބުންޏެވެ.

”އެ މަސައްކަތަކަށް އިތުރު މުއްދަތު ދިޔަ ކަމަށްވިޔަސް ސަރުކާރުގެ މަގުސަދަކީ ފްލެޓް ހޯދަން ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރު ކުރުމާއެކު، ފްލެޓްތައް ދޫކުރެވޭނީ ހައްގުވެރިންނަށްކަން ޔަގީން ކުރުން،“ ބަޔާނުގައި ބުނެފައިވެ އެވެ.