ޕީއެންސީގެ މެންބަރު އިއްބެގެ ކުންފުނިން ޕެންޝަނަށްވާ ބައި ލައްކަ ރުފިޔާ ނުދައްކާތީ ހުކުމެއް

ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެމްބަރު އިބްރާހިމް ހުސައިން (އިއްބެ)ގެ ޑްރީމްސް ހޯލްޑިން ޕްރައިވެޓް ލިމިޓެޑުން މުވައްޒަފުންގެ ޕެންޝަނަށް ޖަމާކުރަންޖެހޭ ބައި ލައްކައަށްވުރެ ގިނަ ރުފިޔާ ނުދައްކާތީ އެ ފައިސާ ދައްކަން ސިވިލް ކޯޓުން ހުކުމްކޮށްފި އެވެ.

ޕެންޝަން އޮފީހުން، ސިވިލް ކޯޓުގައި ޑްރީމްސް ހޯލްޑިންއާ ދެކޮޅަށް ކުރި ދައުވާގައި ބުނެފައިވަނީ ”ދިވެހިރާއްޖޭގެ ޕެންޝަނާބެހޭ ގާނޫނު“ގައި ބަޔާންކޮށްފައިވާ ގޮތުގެ މަތިން ޑްރީމްސް ހޯލްޑިން ކުންފުނިން 51،814.50 ރުފިޔާ، މޯލްޑިވްސް ރިޓަޔާމެންޓް ޕެންޝަން ސްކީމަށް ޖަމާކޮށްފައިނުވާ ކަމަށެވެ. އެހެންވެ އެ ފައިސާއާއި އެ ފައިސާ ނުދެއްކުމުގެ ސަބަބުން އަރައިފައިވާ ޖޫރިމަނާގެ ފައިސާ ދެއްކުމަށް ޑްރީމްސް ހޯލްޑިންގެ މައްޗަށް ހުކުމްކޮށް ދިނުމަށް އެދިފައިވެ އެވެ.

އެ ދައުވާއަށް ޑްރީމްސް ހޯލްޑިން ކުންފުނިން ރައްދު ދީފައެއް ނުވެ އެވެ. އަދި ދައުވާ ފޯމާ ހަވާލުވިކަމުގެ ލިޔުންވެސް އެ ކުންފުނިން ހުށަހަޅާފައެއް ނުވެ އެވެ. އެހެންވެ ޕެންޝަން އޮފީހުން ވަނީ ޑްރީމްސް ހޯލްޑިން ކުންފުނީގެ ގައިރު ހާޒިރުގައި މައްސަލަ ނިންމައިދިނުމަށް އެދިފަ އެވެ.

އެ މައްސަލައިގައި ސިވިލް ކޯޓުން އިއްޔެ ކުރި ހުކުމުގައި ވަނީ، ޕެންޝަން އޮފީހުން އެދުނު ގޮތަށް ޕެންޝަންގެ ގޮތުގައި ލިބެންޖެހޭ ފައިސާއާއި ޖޫރިމަނާގެ ފައިސާގެ ގޮތުގައި ދައްކަންޖެހޭ 53،071.94 ރުފިޔާ، 4 މަސް ދުވަހުގެ ތެރޭގައި ޕެންޝަން އޮފީހަށް ދައްކައި ހަލާސް ކުރުމަށެވެ.