ހުޅުމާލޭ ހޮސްޕިޓަލްގެ އިމަޖެންސީ ރޫމުގެ ޖާގަ ދެގުނަ ބޮޑުކުރަން އާރުޑީސީއާ ހާވަލުކޮށްފި

ހުޅުމާލޭ ހޮސްޕިޓަލްގެ އިމަޖެންސީ ރޫމް (އީއާރް) ބޮޑުކުރުމުގެ މަޝްރޫއު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ ހަވާލުކޮށްފި އެވެ.

ހުޅުމާލޭ ހޮސްޕިޓަލުގައި އިއްޔެ ބޭއްވި ރަސްމިއްޔާތެއްގައި ހުޅުމާލޭ ހޮސްޕިޓަލްގެ އީއާރް ބޮޑު ކުރުމުގެ އެއްބަސްވުމުގައި މާލެ ގުރޫފް އޮފް ހޮސްޕިޓަލްސްގެ ފަރާތުން ސޮއިކުރެއްވީ ސީއީއޯ އިބްރާހީމް އަބްދުއްރައްޒާގު ހަލީމެވެ. އާރުޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރެވެ.

އެ އެއްބަސްވުމުގެ ދަށުން މިހާރު ހުޅުމާލޭ ހޮސްޕިޓަލުގައި ބޭނުން ކުރަމުން އަންނަ ހަތް އެނދުގެ އީއާރް ރޫމް 14 އެނދުގެ ޖާގައަށް ބޮޑު ކުރާނެ އެވެ. އެ މަޝްރޫއު އާރްޑީސީއާ ހަވާލުކުރީ ދެ މަސް ތެރޭ މަސައްކަތް ނިންމާ ގޮތަށެވެ.

އެއްބަސްވުމުގައި ސޮއިކުރުމަށްފަހު ހަލީމް ވިދާޅުވީ އީއާރް ބޮޑުކުރުމުގެ މަސައްކަތް އާރުޑީސީއާ ހަވާލުކުރީ މަސައްކަތުގެ ތަޖުރިބާ ހުރުމާއި މިހާރު އެ ކުންފުނިން ކުރިއަށް ގެންދާ މަޝްރޫއުތައްވެސް ބޭނުންވާ ފެންވަރަށް ބާރު ސްޕީޑުގައި ނިންމާތީ ކަމަށެވެ.

އާރުޑީސީން ބުނީ ދެ މަސް ތެރޭގައި އެ މަސައްކަތް ނިންމަން ހަވާލުކުރި ނަމަވެސް ހުޅުމާލޭ ހޮސްޕިޓަލަކީ ދުވާލަކު އެތައް ބަޔަކު ހިދުމަތް ހޯދަމުންދާ ތަނަކަށްވާތީ އެ ކުންފުނީގެ އަމާޒަކީ އެ މުއްދަތުގެ ކުރިން މަސައްކަތްތައް ނިންމާލެވޭނެ ގޮތަކަށް ކަންކަން ތަރުތީބުކޮށްގެން ކުރިއަށް ގެންދިއުން ކަމަށެވެ.

ދާދި ފަހުން ޓާޝަރީ ފެންވަރަށް ތަރައްގީކޮށް ހުޅުވި ހުޅުމާލޭ ހޮސްޕިޓަލުގެ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް އެ ހޮސްޕިޓަލްގެ އިމަޖެންސީއާއި ޖީއޯޕީޑީ ހިދުމަތް 250،000 އަށްވުރެ ގިނަ މީހުން ހޯދާފައިވެ އެވެ.