އޭޕްރިލް 3, 2025

އިޒްރޭލު ޕާސްޕޯޓް މަނާކުރާ ބިލާ ގުޅޭ ގަރާރު ބޭރުކުރީ އެމްޑީޕީގެ ހެޔޮނިޔަތް ނެތުމުން: ޕީއެންސީ

އިޒްރޭލުން ގާޒާގައި ހިންގާ އަނިޔާވެރި އަމަލުތަކާ ގުޅިގެން އިޒްރޭލު ރައްޔިތުން ރާއްޖެ އަޔަނުދިނުމަށްޓަކައި، އިޒްރޭލު ޕާސްޕޯޓް މަނާކުރުމުގެ ގޮތުން ދިވެހިރާއްޖޭގެ އިމިގްރޭޝަން ގާނޫނު“ އަށް އިސްލާހު ގެންނަން ހުށަހެޅި ބިލުގެ މަސައްކަތް އަވަސްކުރަން ބާރުއަޅައިދިނުމަށް ސަރުކާރަށް ގޮވާލައި މަޖިލީހަށް ހުށަހެޅި ގަރާރު ބޭރުކޮށްލަން ޖެހުނީ އެ މައްސަލައާ ގުޅިގެން އެމްޑީޕީގެ ހެޔޮނިޔަތެއް ނެތުމުގެ ސަބަބުން ކަމަށް ޕީއެންސީން ބުނެފި އެވެ.

މަޖިލީހުގެ އިއްޔެގެ ޖަލްސާގައި އެ ގަރާރު ބޭރުކޮށްލީ، ވެރިކަންކުރާ ޕީއެންސީ އާއި އެޕާޓީގެ ކޯލިޝަން ޕާޓްނާ ޕާޓީތައް ހިމެނޭހެން 63 މެންބަރުން ވޯޓުންނެވެ.

ގަރާރު ބޭރުކޮށްލުމަށްފަހު ޕީއެންސީން ރޭ ނެރުނު ނޫސްބަޔާނެއްގައި ބުނީ އެމްޑީޕީގެ ފަރާތުން ހުށަހެޅި އެ ގަރާރު ބޭރުކޮށްލީ ރަގަޅު ނިޔަތުގައި ހުށަހެޅި ގަރާރަކަށް ނުވެފައި، މަޖިލީހުގައި ކުރަން ހުރި މަސައްކަތްތަކުގެ ވަގުތު ނަގައިލުމުގެ ބޭނުމުގައި ހުށަހެޅި ގަރާރަކަށް ވާތީ ކަމަށެވެ.

ޕީއެންސީން ބުނީ އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމުގެ ބިލުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ހުއްޓުމެއްނެތި ސަރުކާރުން ކުރަމުންދާނެ ކަމުގެ ޔަގީންކަން ދޭ ކަމަށެވެ.

އިޒްރޭލުގެ ލާއިންސާނީ އަނިޔާވެރި އަމަލުތައް ބައިނަލްއަގުވާމީ މަސްރަހުގައި އެންމެ ހަރުއަޑުން ކުށްވެރިކުރައްވައި، އިރުމަތީ ގުދުސް ވެރިރަށެއްގެ ގޮތުގައި އޮންނަ މިނިވަން މުސްތަގިއްލު ފަލަސްތީނު ދައުލަތެއް ގާއިމުކުރުމަށާއި، ގާޒާއަށް އިންސާނީ އެހީތެރިކަން ހުއްޓުމެއް ނެތި ފޯރުކޮށްދެވޭނެ ނިޒާމެއް ގާއިމުކުރުމަށާއި، އިސްރާއީލުގެ އަނިޔާވެރި އަމަލުތަކާމެދު ޖަވާބުދާރީކުރުވުމަށް އެންމެ ވަރުގަދައަށް ވަކާލާތުކުރައްވާ އެއް ލީޑަރަކީ ރައީސް ޑރ. މުހައްމަދު މުއިއްޒު ކަމަށް ޕީއެންސީން ބުންޏެވެ.

އިޒްރޭލުގެ ޕާސްޕޯޓު މަނާކުރުމުގެ ބިލުގެ މަސައްކަތް އެކަމާ ގުޅޭ މާހިރުންގެ ލަފައާއި އިރުޝާދާއެކު ކުރިއަށް ގެންގޮސް، އެކުލަވައިލާފައިވާ ތާވަލާ އެއްގޮތަށް ނިންމާނެ ކަމަށް ޕީއެންސީން ބުންޏެވެ.

”ދިވެހިރާއްޖޭގައި މީގެ ކުރީން އެއްވެސް ސަރުކާރަކުން ނުކުރާ މަސައްކަތް، ފަލަސްތީނު ރައްޔިތުންގެ ހައްގުގައި ކުރާކަން، ރާއްޖޭގެ ރައީސްކަން ކުރީން ކުރައްވާފައިވާ ތަޖުރިބާކާރު ބޭފުޅުންވެސް ދަނީ މީޑިއާގައި ފާހަގަކުރައްވަމުންނެވެ. ފަލަސްޠީނުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ފަރާތުން އެންމެ ބޮޑު މާލީ އެހީތެރިކަމެއް މިހާތަނަށް ވެދިނީވެސް ޕީއެންސީން ސަރުކާރު ހިންގުމުގައި މި ހޭދަކުރި އެއް އަހަރުއެވެ.“ ޕީއެންސީގެ ބަޔާނުގައިވެ އެވެ.

ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް ހުށަހެޅުއްވިމި ގަރާރަކީ، އިޒްރޭލް ޕާސްޕޯޓް މަނާކުރުމުގެ ބިލުގެ މަަސައްކަތް އަވަސްކުރަން ގޮވާލަން ގަރާރު ހުށަހެޅިއިރު، އެ ބިލުގެ މަސައްކަތް އޮތީ ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ)ގައި ތާށީވެފައެވެ.

6 Comments

  • Dhon Dhon ނޮވެމްބަރ 21, 2024

    އިދިކޮޅުމެންބަރުން ކިތަންމެ ރަނގަޅުބިލެއް ނުވަތަ މައްސަލައެއް ވެއްދިޔަސް އެނެރެނީ އިދިކޮޅު މެންބަރުންގެ ނިޔަތް ގޯސްވެގެން ނެއްނޫނޫން. ރަނގަޅު ކަމެއްވެއްޖެޔާ ނިޔަތް ރަނގަޅުކޮއްފަ އެ ބަލައިގަތުން މޮޅުއިތުރީ.. މެޖޯރިޓީ ލިބުނީމަ ތިހާ ހަޔާތްކުޑަވާކަށް ނުވާނެ…

  • Nasiha Moosa ނޮވެމްބަރ 21, 2024

    ދުނިޔެ މިހެން ކުރިޔަށް ދާތީ ނޫންތަ

  • Ahmed Vaarey ނޮވެމްބަރ 21, 2024

    MDP ge heyo niyatheh nethumee PNC ge niyai goasvaanjehey sababeh noon.

  • Ahmed Shaxmyn ނޮވެމްބަރ 21, 2024

    Bayaku alhe moya vedhaane ehnun..

  • Fathimath Binth Ibrahim ނޮވެމްބަރ 23, 2024

    Heyo niyathuga ekani kurevey kamakee rishvathu keun

  • Maryam Yumna ނޮވެމްބަރ 24, 2024

    MDP ge heyo niyeh oiytho nehtho balaakah nujey egihjje

Leave a Reply