ސިއްހީ ހާލުކޮޅު ހުރިިގޮތުން މަގާމުގެ ޒިންމާ އަދާނުކުރެއްވޭނެތީ އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. އައިޝަތު ރަމީލާ މިއަދު އިސްތިއުފާދެއްވައިފި އެވެ.
ރަމީލާ ގެންދެވީ ކެންސަރު ބައްޔަށް ބޭސްކުރައްވަމުނެވެ.
ރައީސް އޮފީހުން މިއަދު ބުނީ ރަމީލާގެ އިސްތިއުފާގެ ސިޓީ ރައީސް ޑރ. މުހައްމަދު މުއިއްޒު ގަބޫލުފުޅު ކުރައްވައިފައިވާ ކަމަށެވެ.
ރައީސް މިއަދު ނެރުއްވި ނޫސްބަޔާނެއްގައި ވިދާޅުވީ އަލާސްކަންފުޅުގައި އުޅުއްވަމުން ވެސް، ރަމީލާ ވަނީ ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެއްވުމަށް މަސައްކަތް ކުރައްވައިފައި ކަމަށެވެ. ރައީސް ވިދާޅުވީ ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، ރަމީލާ ދެއްވި އެއްބާރުލެއްވުމަށާއި، ތެދުވެރިކަމަށް އަދި ސަރުކާރަށް ކޮށްދެއްވި އަގުހުރި ހިދުމަތްތަކަށްޓަކައި އިހުލާސްތެރިކަމާއެކު ޝުކުރު އަދާކުރައްވާ ކަމަށެވެ.
”ޑޮކްޓާ އާއިޝަތު ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އަޅުގަނޑަށް ލިބުނު ވަރަށް ބޮޑު އުފަލެކެވެ. ކުރިއަށް އޮތްތާނގައިވެސް ކަމަނާގެ ހިދުމަތް ދިވެހި ގައުމަށް ލިބޭނެކަން އަޅުގަނޑު ޔަގީންކުރަމެވެ.“ ރައީސް ވިދާޅުވިއެވެ.
މިނިސްޓަރުކަމާ މިދިޔަ އަހަރުގެ 17 ނޮވެމްބަރުގައި ހަވާލުވެވަޑައިގަތުމަށް ފަހު ވެސް މި އަހަރުގެ ފެބްރުއަރީ މަހާ ޖެހެންދެން ރަމީލާ ގިނަ ދުވަސްތަކެއް ރާއްޖެއިން ބޭރުގައި ފަރުވާ ހޯއްދަވަން ހޭދަކުރެއްވިއެވެ.
ރަމީލާ އިސްތިއުފާދެއްވި ނަމަވެސް، އެ މިނިސްޓްރީގެ ހިންގުން ވަގުތީ ގޮތުން އެހެން ބޭފުޅަކާ ހަވާލުކުރެއްވި ކަމެއް ނުވަތަ ނޫން ކަމެއް ސަރުކާރުން ހާމަކޮށްފައެއް ނުވެއެވެ.
ގުޅުންހުރި
ކެޓް ޝެލްޓާ ހަދަން ދިޔަ ހަރަދު ދިނުމުން މިނިސްޓްރީއާ އެތަން ހަވާލުކުރާނަން!