ޒަކިއްޔާ މަރާލި ކަމުގެ ހެއްކެއް ނެތް: ފުލުހުން

ނ. ހޮޅުދޫގައި ޒަހަމްތަކަކާއެކު މަރުވެފައި އޮއްވައި ފެނުނު އެ ރަށު މާރަނގަ، ޒަކިއްޔާ މޫސާގެ މަރުގެ މައްސަލައިގައި އެއްވެސް މީހެއްގެ ބައިވެރިވުމެއް ނެތް ކަމަށާއި އެހެން މީހަކު ޒަކިއްޔާ މަރާލިކަމުގެ ހެއްކެއް ނެތް ކަމަށްވެސް ފުލުހުން ބުނެފި އެވެ.

އިސްކަންދަރު ކޮށީގައި މިއަދު ނޫސްވެރިންގެ ބައްދަލުވުމެއްގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ، އެ ހާދިސާއާ ގުޅިގެން ޒަކިއްޔާގެ ހަށިގަނޑު ބެލި ބެލުމުން އޭނާގެ ކަރުގެ ދެ ފަރާތަކަށް، ކަނާތް އައި ވައާތް ފަރާތަށް ތޫނު އެއްޗެކުން ލިބިފައި ހުރި އަނިޔާގެ ގިނަ ޒަހަމްތަކެއް ފެންނަން ހުރި ކަމަށެވެ. އެގޮތުން ކަރުގެ ވައަތް ފަޅީގައި ފުން ތިން ޒަހަމެއް އަދި ކަނާތް ފަރާތުގައި ފުން ދެ ޒަހަމެއްގެ އިތުރުން، ކަރުގައި މެދާއި ހިސާބުގައި ތިލަކޮށް ހުރި އެއް ޒަހަމް ހުރި ކަމަށްވެސް ވިދާޅުވި އެވެ.

ހަށިގަނޑުގެ އެހެން ތަނަކަށް އެ ނޫން އެއްވެސް ޒަހަމެއް ލިބިފައި ހުރި ކަން ފާހަގަކުރެވިފައެއް ނުވާ ކަމަށް ސާމިހު ވިދާޅުވި އެވެ.

ސާމިހު ވިދާޅުވީ ޒަކިއްޔާގެ ހަށިގަނޑު އެރޭ މާލެ ގެނެސް ޕެތޮލޮޖިސްޓް ޑޮކްޓަރެއް ހަށިގަނޑު ބެލި ކަމަށާއި ޖެހިގެން އައި ދުވަހު ހަށިގަނޑު އަނބުރާ ހޮޅުދޫއަށް ގެންދެވި އާއިލާ ހަވާލުކޮށް އެ ދުވަހު ހަށިގަނޑު ވަޅުލާފައިވާ ކަަމަށެވެ.

އުމުރުން 50 އަހަރުގެ ޒަކިއްޔާގެ ބޮޑެތި ޒަހަމްތަކަކާއެކު މަރުވެފައި އޮއްވާ ފެނުނީ އޭނާ ދިރިއުޅުނު ގޭގެ ބަދިގެ ފަރާތުގައި ހުންނަ ގުދަނެއްގެ ކައިރިން ސެޕްޓެމްބަރު 10 ވަނަ ދުވަހުގެ ހެނދުނު 10:00 ހާއިރެވެ. އޭނާއަކީ ޑިޕްރެޝަނަށް ފަރުވާ ހޯދާ މީހަކަށްވާތީ އެންމެ ފުރަތަމަ އޭނާ މަރުވީ އަމިއްލައަށް ކަމަށް އަޑު ފެތުރުނުއިރު، އެ މައްސަލައިގެ ތަހުގީގަށް ފުލުހުންގެ ޓީމެއް އެ ރަށުގައި ދެ ފަހަރެއްގެ މަތިން ހަރަކާތްތެރިވެފައިވެ އެވެ.

”މި މައްސަލައާ ގުޅުވައި ބައެއް މީހުންގެ ބޮޑެތި ކަންބޮޑުވުންތަކުގެ ގޮތުގައި ފާހަަގަކޮށްފައިވާ ކަންކަން އިތުރަށްވެސް ކަށަވަރު ކުރުމަށް މަސައްކަތް ކުރެވުނު،“. ސާމިހު ވިދާޅުވި އެވެ.

އެގޮތުން ނަރުދަމާ ނިޒާމުގެ ތެރެއިން ފެނުނު ބުރުގާއަކީ ޒަކިއްޔާގެ އެއްޗެއްތޯ ފުލުހުންް ބެލި ކަމަށާއި އެގޮތުން ފުލުހުން ހިންގި ތަހުގީގުން އެއީ ޒަކިއްޔާ އަޅާ ބުރުގަލެއް ނޫންކަން އެނގިފައިވާ ކަމަށްވެސް ސާމިހު ވިދާޅުވި އެވެ.

އޭނާ ވިދާޅުވީ ސީނުން ފެނުނު ވަޅީއަކީ ޒަކިއްޔާ ގޭގެ ބަދިގޭގައި ބޭނުންކުރަމުންދާ ވަޅިއެއް ކަމަށާއި ޒަކިއްޔާ ލައިގެން ހުރި ހެދުމުގައި ލޭ ހުރި ކަމަށެވެ.

”ޒަކިއްޔާ އޮތް ގުދަން ތެރެއާއި ގޭތެރޭގެ އިތުރުން، ޒަކިއްޔާގެ ހަށިގަނޑުންވެސް އެއްވެސް، ސްޓްރަގްލްއެއް ނުވަތަ އެއްވެސް އިތުުރު ފަރާތެއްގެ ފުށުން ލިބިފައިވާ އަނިޔާއެއްގެ ނިޝާނެއް ފާހަަގަކުރެވިފައި ނުވާކަން،“. ސާމިހު ވިދާޅުވި އެވެ.

އަދި މި މައްސަލައާ ގުޅިގެން ސީޓީ ސްކޭނެއްވެސް ހެދިފައިވާއިރު، އޭގެ ނަތީޖާއިންވެސް ޒަކިއްޔާގެ ހަށިގަނޑުން، އަނިޔާއެއް ނުވަތަ ސުވާލު އުފެދޭ ކަމެއް ފެނިފައި ނުވާކަމަށްވެސް ސާމިހު ފާހަގަކުރައްވާފައި ވެއެވެ.