ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރުގެ މަގާމުގައި ހުންނަވައިގެން އިބްރާހިމް ފަޒުލް ރަޝީދު ކުރައްވަމުން ގެންދެވި އުސޫލާ ހިލާފު އަދި ކޮރަޕްޝަނަށް ތުހުމަތު ކުރެވޭ އެތައް މައްސަލައެއް މީގެ ފަސް މަސް ކުރިން ރައީސް ޑރ. މުހައްމަދު މުއިއްޒުގެ ސަމާލުކަމަށް، ގެނެސްފައިވާކަން ހާމަވެއްޖެ އެވެ.
އެކަން ހާމަވީ އެޗްޑީސީގެ ކުރީގެ ޗެއާމަން އަހުމަދު ޒުހޫރު، ރައީސްއަށް ފޮނުއްވި ހަތް ސަފުހާގެ ސިޓީ އެއްގައެވެ. ރައީސްގެ ހާއްސަ އެދިވަޑައިގަތުމަކަށް އެޗްޑީސީގެ ޗެއާމަންކަމާ ހަވާލުވެވަޑައިގެންނެވި ޒުހޫރު އެ ސިޓީ ރައީސަށް ފޮނުއްވާފައިވަނީ މި އަހަރުގެ ޖުލައި މަހުގެ ތެރޭގަ އެވެ. އެއީ އޭނާ މަގާމުން ވަކިކުރިތާ ދެ މަސް ފަހުންނެވެ.
ޒުހޫރުގެ ސިޓީގައި އެތެރޭގައި މޫލާފައިވާ ކޮރަޕްޝަންގެ ވަރަށް ގިނަ ވާހަކަތަކާއި ވިޔަފާރިވެރިންގެ ޝަކުވާތައް ހިއްސާކޮށްފައިވެ އެވެ.
ޒުހޫރުގެ ސިޓީގައި ވިދާޅުވެފައިވަނީ އޭނާ އެޗްޑީސީގެ ޗެއާމަންގެ މަގާމަށް އައްޔަންކުރި ދުވަސްވަރަކީ އުސޫލުތައް ބަދަލުކޮށް ތިލަފުށިން ބިމެއް ބަދަލު ކުރި ވާހަކާ އާއި ފަޒުލްގެ އަނބިކަނބަލުންނަށް ހުޅުމާލެއިން ބިމެއް ދިން ވާހަކަ އާއި ވިޔަފާރިވެރިންނަށް ދަތި އުދަނގޫތަކާއި ކުރިމަތިލާން ޖެހުނު ދުވަސްވަރެއް ކަމަށެވެ.
އަދި އޭރު ރައްޔިތުންގެ މަޖިލީހުގެ އިންތިހާބު ކުރިއަށް އޮތުމުން އެކަމަށް ވިޔަފާރިވެރިންގެ އެހީތެރިކަން މުހިންމުވާނެތީ، މަސައްކަތް ކުރީ އެ މީހުންގެ މައްސަލަތަކަށް ހައްލު ހޯދައިދޭން ކަމަށްވެސް ވިދާޅުވި އެވެ.
ޒުހޫރު ވިދާޅުވީ، އެ ވާހަކަތައް ފަޒުލްއާ ހިއްސާކުރުމުން އޭނާ އިސްކުރެއްވީ ރުޅި ކަމަށާއި ހަމަޖެހިގެން ފަސް މިނެޓުވެސް ވާހަކަ ދެއްކޭވަރު ނުވި ކަމަށެވެ. އަދި ’ތިމަންނާ ކަންތައް ކުރާނެ ގޮތް އެނގޭނީ ތިމަންނާއަށް‘ ކަމަށް ވިދާޅުވި ކަމަށްވެސް ޒުހޫރުގެ ސިޓީގައި ވިދާޅުވެފައިވެ އެވެ.
”ކުންފުނިތަކާމެދު އެޗްޑީސީގެ އެމްޑީ އަމަލުކުރާ ގޮތުގެ ވާހަކަތައް އަޑުއެހީމެވެ. އަދި އާންމު ރައްޔިތުންގެ ވާހަކަތައްވެސް އަޑުއެހީމެވެ. އެންމެންގެ ވާހަކައިން ދޭހަވީ ފަޒުލް ރަޝީދުގެ ހަމައެކަނި ބޭނުމަކީ އަމިއްލަ ބޭނުމަށް ފައިސާ ހޯދުން ކަމެވެ. އެކި ވަރުވަރުން އެކި ފަރާތްތަކުން ފައިސާ ނަގަމުންދާ ވާހަކަ އަޑުއިވެއެވެ. ވިނަރެސް ފްލެޓް ލިބެނީވެސް ފައިސާދޭ ފަރާތްތަކަށް ކަމަށް އަޑުއިވެއެވެ. އެކި އަދަދުން ފައިސާ ނަގައިގެން ބިމާއި ފްލެޓް އެޅުމުގެ ފުރުސަތު ދޭކަން ފާހަގަކުރަމެވެ… އަޑުއިވެނީ އެޗްޑީސީން ކަމެއް ވަނީ ފައިސާ ދޭ މީހާއަށްކަން މަނިކުފާނުގެ މައުލޫމާތަށްޓަކައި ދަންނަވަމެވެ.“ އެޗްޑީސީގެ ކޮރަޕްޝަންގެ ވާހަކަތައް ރައީސްގެ ސަމާލުކަމަށް ގެންނަމުން ޒުހޫރުގެ ސިޓީގައި ވިދާޅުވެފައިވެ އެވެ.
ޒުހޫރުގެ ސިޓީގައި ފަޒުލްގެ މަސްލަހަތު ފުށޫއަރާ އެތައް މައްސަލައެއް ފާހަގަ ކޮށްފައިވެ އެވެ. ނަމަވެސް އެކަންކަން ބޯޑުން ނިންމާފައި ވަނީ މަސްލަހަތު ފުށުއަރާކަން ފާހަގަ ނުކޮށް ކަމަށް އެ ސިޓީގައިވެ އެވެ. އެ ކަންތައްތަކުގެ ތެރޭގައި ހިމެނެނީ:
- ފަޒުލްގެ އަންހެނުން ޒުލްފީނާ ރަޝީދު ހުޅުމާލެއިން ބިންގަތުމަށް ފައިސާ ދެއްކުމަށް ފަސް އަހަރަށް ބަހާލައިގެން ދިނުން
- ޒުލްފީނާގެ މައްސަލަ ޕަބްލިކަށް ތިލަވުމުން އެކަން މަތިޖެހުމަށް އިތުރު ފަސް މީހަކަށް، ފަސް އަހަރުން ފައިސާ ދައްކާގޮތަށް ބިން ވިއްކުން
- އަމިއްލަ މަސްލަހަތު އޮންނަ މޯލްޑިވްސް އޮއިލް ކޮމްޕެނީ އާއި ހައިޕާލޫޕަށް ބިމެއް ހަމަޖެއްސުން. މި ދެ ކުންފުންޏަށްވެސް ދެ ފަހަރަށް ބިން ދީފައިވޭ
- އިތުރު ދެ ކުންފުންޏަކަށް ދެ ބިން ދިނުމުގައި ފަޒުލްގެ މަސްލަހަތު އޮތް މައްސަލަ
”މިއީ އަމިއްލަ މަސްލަހަތު ހުރެ ޑިކެލެއާ ނުކުރުމުން ބަލަންޖެހޭ ކަންތައްކަމަށް އަޅުގަނޑަށް އައިސްފައިވާ ޝަކުވާތަކެވެ. ޝަކުވާތައް ބެލުމަށް މާހައުލެއް ނެތިގެން ބެލޭނެ މާހައުލެއް އުފެއްދުމަށްޓަކައި ކޮމިޓީއެއް ވެސް އެކުލެވުނަ ނުދިންކަންވެސް ފާހަގަކުރަމެވެ،“ ރޒުހޫރު ފޮނުއްވި ސިޓީގައިވެ އެވެ.
ޒުހޫރުގެ ސިޓީގައި ޝައްކު އުފެދޭ އެހެނިހެން ކަންކަންވެސް ފާހަގަކުރައްވާފައިވެ އެވެ. އެގޮތުން އާމިރު މަންސޫރަށް މާލެ ވެސްޓްޕާކުގެ ބަދަލުގައި ހުޅުމާލެއިން ތިން ބިން ދިން މައްސަލައަކާއި ”ރަސްމާލެ“ ހިއްކަން ހަވާލުކުރި ސީއެމްސީ ކުންފުންޏަށް ފަސް ހެކްޓަރުގެ ބިމެއް ދޫކުރުމަށް ފަހު، އެ ކުންފުންޏަށް އެތައް މިލިއަން ޑޮލަރެއް އެޗްޑީސީން ދޫކުރި މައްސަލައެއް ފާހަގަކުރައްވާފައިވެ އެވެ.
ޒުހޫރު ވިދާޅުވީ، ސީއެމްސީއަށް އެތައް މިލިއަން ޑޮލަރެއް އެޗްޑީސީން ދޫކުރީ އެއްވެސް ޑިއުޑެލިޖެންސް ރިޕޯޓެއް، ތާޑް ޕާޓީ އިންސްޕެކްޝަން ރިޕޯޓެއް ނެތި ކަމަށެވެ.
އޭގެ އިތުރުން ލަގްޒަރީ ހައުސިންގެ މަޝްރޫއެއް ހިންގަން ފަސް ކުންފުންޏަކާ ހަވާލުކުރި ގޮތުން އެ ކުންފުނިތަކުން ކޮންމެ ޕްރޮޖެކްޓަކުން ވެސް މިލިއަން ޑޮލަރު ނަގާފައިވާ ކަމަށާއި އެއީ ފަޒުލް އަމިއްލަ މަސްލަހަތު އިސްކޮށް ކުރެއްވި ކަމެއް ކަމަށް ވެސް ޒުހޫރުގެ ސިޓީގައި ތުހުމަތު ކުރައްވާފައިވެ އެވެ.
ޒުހޫރު ފާހަގަކުރެއްވި އެހެން ބައެއް މައްސަލަތައް:
- ހިޔާފްލެޓްގެ ލިފްޓް ހަރުކުރަން ބަޔަކަށް 18 މިލިއަން ޑޮލަރަށް ދީފައިވަނީ މާކެޓް އަގަށް ވުރެ އެތައް ގުނައެއް އަގުބޮޑުކޮށް ކަން
- ލޯނު ހަމަނުޖެހެނީސް އޮޓޯ ސެންޓާ އެޅުމަށް އެޑްވާންސް ގޮތުގައި އެތައް މިލިއަން ޑޮލަރެއް ދޫކޮށްފައިވާ ކަން
- ކޮމާޝަލް ސްޕައިން ހެދުމުގެ ނަމުގައި ލޯނު ހަމަނުޖެހެނީސް އެޑްވާންސް ޕޭމަންޓް ދޫކޮށްފައިވުން.
ޒުހޫރުގެ ސިޓީގައި އިތުރަށް ވިދާޅުވެފައިވަނީ އެޗްޑީސީގެ އެތެރެ އެހާ ގޯސްކޮށް ހިނގަމުންދިޔަ ކަންކަން ރަނގަޅު ކުރެވޭތޯ ކުޑަ މިންވަރަކަށް ވެސް ރަނގަޅު ކުރެވޭތޯ މަސައްކަތް ކުރައްވާފައި ވާނެ ކަމަށާއި ނަމަވެސް، އޭގެ ބަދަލުގައި އޭނާގެ މަގާމު ގެއްލުނީ ކަމަށެވެ. މަގާމުން ވަކިކުރިއިރު އެއްވެސް ވަރަކަށް ކަން ހިނގާފައިވާ ގޮތާއި ވަމުންދާ ގޮތް ރައީސް އޮޅުން ފިލުއްވާފައި ހިތާމަ ކުރައްވާ ކަމަށް ޒުހޫރު ވިދާޅުވި އެވެ.
އެކަންކަން ކިޔައިދިނުމަށް ރައީސްގެ އެޕޮއިންޓްމަންޓަކަށް ވެސް އެދުނު ކަމަށާއި ނަމަވެސް، މަގާމުން ވަކިކުރިއިރު، އެ ފުރުސަތު ލިބިފައި ނުވާ ކަމަށް ވެސް އޭނާ ވިދާޅުވި އެވެ.
2 Comments
ގުޅުންހުރި
ދަރިފުޅަށް އަހަރެއް ވަންދެން އަނިޔާދީ މަރާލުމަށްފަހު ހަށިގަނޑު އަންދާލި މަންމަ ޖަލަށް
އިލްމު އުނގެނޭށެވެ. އެހެނީ މަރުވުމަށްފަހުވެސް އުނގެނި، އަނެކާއަށް ފޯރުކޮށްދިން އިލްމުގެ ފައިދާ
”ބައްޕާއޭ، ދޮންބެގެ އަތުން ދޫވީއޭ، ސަލާމަތްކުރަން ވަރަށް މަސައްކަތް ކުރީމޭ“
ތިލަމާލެ ބްރިޖްގައި ދުނިޔޭގެ އެންމެ އުސް ޕްރީކާސްޓް ސެގްމަންޓް ބަހައްޓައިފި
ލިވަޕޫލްއާ ގުޅިގެން ރާއްޖޭގެ ޓޫރިޒަމް ޕްރޮމޯޓް ކުރުމުގެ ކެމްޕެއިން ލޯންޗުކޮށްފި
މުޝްފިގު ހޯދުމުގެ މަސައްކަތް ކަނޑުމަތިންނާއި ޑައިވް ކޮށްގެން ފަށައިފި، ޑްރޯން ވެސް