ބަދަލުދިން މައްސަލައިގައި ސޯލިހާއި ފައްޔާޒުގެ މައްޗަށް ޖިނާއީ ތަހުގީގެއް ހިންގަން ޕީޖީ އަމުރުކޮށްފި

އެމްޑީޕީގެ ސަރުކާރުގައި ސެޓަލްމަންޓް ކޮމިޓީއެއް ހަދައިގެން ކޯޓުން ބޭރުން އެކިއެކި ކުންފުނިތަކަށް ބަދަލު ދިން މައްސަލާގައި ޖިނާއީ ތަހުގީގެއް ހިންގުމަށް ޕްރޮސެކިއުޓަ ޖެނެރަލް (ޕީޖީ)ގެ އޮފީހުން އެންޓި-ކޮރަޕްޝަން ކޮމިޝަން (އޭސީސީ)އަށް މިއަދު އަންގައިފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީން ވަނީ އެ މައްސަލާގައި ކުރީގެ ސަރުކާރުގެ ތިން ބޭފުޅެއްގެ މައްޗަށް ތަހުގީގު ހިންގަން މާލިއްޔަތު ކޮމިޓީން ފާސްކޮށްފައިވެ އެވެ. އެއީ ކުރީގެ ރައީސް އިބްރާހިމް މުހައްމަދު ސޯލިހު، ރައީސް އޮފީހުގެ ކުރީގެ މިނިސްޓަރު އަލީ ޝިޔާމް އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލެވެ.

ޕީޖީ އޮފީހުން މިއަދު ބުނީ މާލިއްޔަތު ކޮމިޓީން ދިން ރިޕޯޓުގައި، ދައުލަތުގެ އިސް މަގާމުތަކެއް އަދާކުރައްވާފައިވާ ބައެއް ބޭފުޅުންގެ މައްޗަށް ދައުލަތުގެ ފައިސާއާއި މުދާ ހައްގު ނުވާ ބަޔަކަށް ދިން ކަމަށް ކުރެވޭ ތުހުމަތުތަކެއް ބަޔާންކޮށްފައިވާ ކަމަށެވެ. އެހެންވެ، އެ މައްސަލަ ތަހުގީގު ކުރުމަށް އޭސީސީގައި މިދިޔަ ހަފުތާ އަންގާރަ ދުވަހު އެދިފައި ވާނެ ކަމަށް ޕީޖީ އޮފީހުން ބުންޏެވެ.

”އެ ރިޕޯޓުގައިވާ ކަންކަމަށް މި އޮފީހުން ރިއާޔަތް ކުރުމަށް ފަހު، އެ ކަންކަމަކީ އެންޓި-ކޮރަޕްޝަން ކޮމިޝަނަށް ތަހުގީގުކުރުމުގެ ބާރު ލިބިފައިވާ ކަންތައްތަކެއް ކަމަށް ފެންނާތީ، ރައްޔިތުންގެ މަޖިލީހުގެ ރިޕޯޓުގައި ފާހަގަކޮށްފައިވާ މައްސަލައިގެ ޖިނާއީ ތަހުގީގެއް ހިންގުމަށް އެންޓި-ކޮރަޕްޝަން ކޮމިޝަންގައި 17 ޑިސެންބަރު 2024ގައި ދަންނަވާފައިވާނެ އެވެ،“ ޕީޖީ އޮފީހުގެ ވެބްސައިޓުގައި ދެންމެ ޝާއިއުކުރި ލިޔުމުގައިވެ އެވެ.

ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު ވަނީ، ކުރީ ސަރުކާރުން އެކުލަވާލި ސެޓަލްމަންޓް ކޮމެޓީ އުވާލައްވައިފަ އެވެ. އަދި އޭރު ބަދަލު ދިނުމަށް ހެދި ނުވަ އެއްބަސްވުމަށް އުވާލުމަށް އޮޑިޓާ ޖެނެރަލް (އޭޖީ) އޮފީހުން ނިންމާފައިވެ އެވެ.

އެ ގޮތުން، ލެ ޓްރިވެނި ޖޭވީ އާއި ދީބާޖާ އިންވެސްޓްމަންޓް ޕްރައިވެޓް ލިމިޑެޓަށް އިތުރު 61.2 މިލިއަން ރުފިޔާ ދޭން ކުރީގެ ސަރުކާރުން ފިނޭންސް މިނިސްޓްރީގެ ސިސްޓަމަށް އަޅާފައިވަނިކޮށް، މި ސަރުކާރުން އެ ފައިސާ ދިނުން ވެސް މަޑުޖައްސައިލި އެވެ.

ސެޓުލްމަންޓް ކޮމިޓީ މެދުވެރިކޮށް ސޯލިހުގެ ސަރުކާރުގައި، 2018 ވަނަ އަހަރުން ފެށިގެން 2023 ވަނަ އަހަރާ ދެމެދު 36 ރަށަކާއި ހަ ފަޅެއް އަދި ދެ ބިލިއަން ރުފިޔާއަށް ވުރެ ބޮޑު އަދަދެއް އެކި ފަރާތްތަކަށް ދީފައިވާ ކަމަށް ތުހުމަތުކުރެ އެވެ.