އަންހެނެއްގެ ކަރުގައި އޮތް ފަށް ފޭރިގަންނަން އުޅުނު މީހާ ބުނީ ފަށް މިހާރު ނެތް ކަމަށް

މާލޭގެ މަގެއްގެ މަތިން ސައިކަލް ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ފޭރެން އުޅުނު މައްސަލައިގައި އެކަމަށް އިއުތިރާފުވި ނަމަވެސް މިހާރު އެ ފަށް އޭނާގެ އަތުގައި ނެތް ކަމަށް ބުނެފި އެވެ.

އެ މައްސަލައާ ގުޅިގެން ހައްޔަރުކޮށްފައިވަނީ ވިލިމާލޭ، ފިޔަބަރި، ހަސަން އިސާމް، 30އ. އެވެ. އަދި އޭނާ ދުއްވި ސައިކަލުވެސް ޓޯކޮށްފައިވާ ކަމަށް ފުލުހުން ބުންޏެވެ. އޭނާ ހައްޔަރުކުރީ މިމަހުގެ 20 ވަނަ ދުވަހުއެވެ. އެ ދުވަހު އޭނާ ހައްޔަރުކޮށް ބަންދަށް ކޯޓުން ވަނީ ހަތް ދުވަސް ޖަހައިފަ އެވެ. އެކަމަކު އޭރު އޭނާ ކޯޓަށް ހާޒިރުކޮށް ބަންދުގެ މުއްދަތު ޖެހީ ތޫނު ހަތިޔާރު ގެންގުޅުމުގެ މައްސަލައެއްގަ އެވެ.

ކޯޓު އަމުރުގައި ވާ ގޮތުން އެއީ ފޭރުމުގެ މައްސަލައާ ގުޅިގެން ފުލުހުން އޭނާ ހައްޔަރުކޮށް ބަލާ ފާސްކުރިއިރު، އޭނާގެ އަތުން ދެ އިންޗި ވަޅިއެއް ފެނުމާ ގުޅިގެން ކުރި ތުހުމަތެކެވެ. އޭނާގެ ހަތް ދުވަހުގެ ބަންދުގެ މުއްދަތު ހަމަވާތީ އިއްޔެ ކޯޓަށް ހާޒިރުކުރުމުން ފުލުހުން ވަނީ ފޭރުމުގެ މައްސަލާގެ ހެކީގެ ގޮތުގައި ފުލުހުންގެ ބަޔާނާއި ސީސީޓީވީ ވީޑިއޯގެ ސްނެޕްޝޮޓެއް ހުށަހަޅައިފަ އެވެ.

އޭނާ ވަނީ އަންހެން މީހާގެ ކަރުގައި އޮތް ރަން ފަށް ފޭރުނު ކަމަށް އިއްޔެ ކޯޓުގައި އެއްބަސްވެފަ އެވެ. އެހެން ނަމަވެސް، އޭނާގެ އަތުގައި އެ ފަށް ނެތް ކަމަށާއި މައްސަލާގައި ގެއްލުން ލިބުނު މީހާއަށް ބަދަލު ދޭނެ ކަމަށް ވެސް އޭނާ ބުނެފައިވެ އެވެ.

ހަސަން އިސާމަކީ ގިނަ އަދަދެއްގެ ކުށުގެ ރެކޯޑު އޮތް މީހެކެވެ.

ސޯޝަލް މީޑިއާގައި ދައުރުވަމުންދާ ވީޑިއޯގައި ފެންނަ ގޮތުން ސައިކަލުގައި ދުއްވާފައި ދިޔަ އަންހެން މީހާގެ ކަރުގައި އޮތް ފަށް ފޭރިގަންނަން އުޅުނީ އޭނާގެ ފަހަތުން ސައިކަލެއްގައި އައި ފިރިހެނެކެވެ. އެ ފިރިހެން މީހާ ހުރީ ހެލްމެޓް އަޅައިގެންނެވެ.

ނަމަވެސް ފަހަތުން އައިސް ކަރުގައި އޮތް ފަށް ފޭރިގަންނަން ކުރި މަސައްކަތް ނާކާމިޔާބު ވުމުން، ފިރިހެން މީހާގެ ކިބައިން ސަލާމަތްވާން ސައިކަލު މަގުމައްޗަށް ވައްޓާލާފައި އަންހެން މީހާ އެތަނުގެ ކައިރީގައި ހުރި ގެއެއްގެ ތެރެއަށް ވަންނަން ތަން ވީޑިއޯ އިން ފެނެ އެވެ. އަންހެން މީހާގެ ފަހަތުން ފިރިހެން މީހާ ދިޔަ ނަމަވެސް، އެ ވަގުތު އެ ސަރަހައްދަށް މީހުން އެއްވާން ފެށުމުން ފިރިހެން މީހާ ސައިކަލަށް އަރައިގެން އެތަނުން ފިލަ އެވެ.