ރާއްޖޭގެ ހުރިހާ ސަރަހައްދަކަށް މޫސުން ގޯސް، ބޮޑު ބަޔަކަށް ވައިޓް އެލާޓް

ރާއްޖޭގެ ހުރިހާ ސަރަހައްދަކަށް ވެސް މިއަދު ވިއްސާރަ ކަމަށް މެޓް އޮފީހުން ބުނެފި އެވެ.

މެޓް އޮފީހުން މިއަދު ވަނީ އެންމެ އުތުރު ފިޔަވައި އެހެން ހުރިހާ އަތޮޅަކަށް ވައިޓް އެލާޓް ވެސް ނެރެފަ އެވެ.

މެޓުން މިއަދު ހަވީރު 5:30 އާ ހަމައަށް ނެރުނު ފުރަތަމަ އެލާޓުގައިވާ ގޮތުން ބ. އަތޮޅުން ފެށިގެން ދެކުނަށް ހުރި ހުރިހާ އަތޮޅަކަށް ގަޑިއަކު 19 މޭލާއި 20 ދެމެދު ވައި ޖެހި ކަނޑުތައް ގަދަވާނެ އެވެ.

ދެ ވަނަ ވައިޓް އެލާޓް ނެރެފައިވަނީ ބ. އަތޮޅުން ފެށިގެން ލ. އަތޮޅާ ހަމައަށެވެ.

މެޓުން އެ އެލާޓުގައި ބުނީ މި އަތޮޅުތަކަށް ގުރުގުމާ އެކު ބޯކޮށް ވާރޭ ވެހި، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.

ސްކޫލް ބަންދަށް ފަހު އާދިއްތަ ދުވަހު ކިޔެވުން އަލުން ފަށާއިރު މި ދުވަސްވަރު ގިނަ ބަޔަކު ވަނީ ރަށްރަށަށް ގޮސްފަ އެވެ. މެޓް އޮފީހުން ލަފާކުރާ ގޮތުގައި މޫސުން ރަނގަޅުވާނެ ކަމަށް ބެލެވެނީވެސް އާދީއްތަ ދުވަހުގެ ފަހުންނެވެ.