އިންޑިއާއިން ވެރިކަން ވައްޓާލަން އުޅުނު ކަމުގެ ތުހުމަތު އޮތްވަައި ހަލީލު އިންޑިއާއަށް!

އިންޑިއާގެ ޖާސޫސީ އިދާރާ، ރޯއިން ރާއްޖޭގެ އިދިކޮޅު ފަރާތްތަކާ ގުޅިގެން ރައީސް ޑރ. މުހައްމަދު މުއިއްޒުގެ ވެރިކަން ވައްޓާލަން އުޅުނު ކަމުގެ ތުހުމަތު ކުރެވިފައި ވަނިކޮށް ފޮރިން މިނިސްޓަރު ޑރ. އަބްދުﷲ ހަލީލު، އިންޑިއާއަށް ވަޑައިގެންފި އެވެ.

މިއީ ހަލީލު، ފޮރިން މިނިސްޓަރުގެ މަގާމާ ހަވާލުވެވަޑައިގަތުމަށްފަހު އިންޑިއާއަށް ކުރެއްވި ފުރަތަމަ ދަތުރުފުޅެވެ.

މި ދަތުރާ ބެހޭ މައުލޫމާތެއް ރާއްޖޭގެ ފޮރިން މިނިސްޓްރީން ވެސް އަދި އިންޑިއާގެ އެކްސްޓާނަލް އެފެއާޒް މިނިސްޓްރީން ހާމައެއް ނުކުރެ އެވެ.

ހަލީލު ކުއްލިއަކަށް އިންޑިއާއަށް ވަޑައިގެންފައިމިވަނީ މި ސަރުކާރު ވައްޓާލަން އިންޑިއާއިން މަސައްކަތް ކުރިކަމަށް އެމެރިކާގެ ވޮޝިންޓަންޕޯސްޓުން ރިޕޯޓުކޮށްފައި ވަނިކޮށެވެ.

ވޮޝިންޓަން ޕޯސްޓުގެ ރިޕޯޓުގައި ބުނެފައިވަނީ ރާއްޖޭގެ އިދިކޮޅު ފަރާތްތަކާއެދު ރައީސް މުއިއްޒު ވެރިކަމުން ބޭލުމުގެ މަޝްވަރާކޮށްފައިވަނީ ރާއްޖެއާއި އިންޑިއާގެ ގުޅުން އެންމެ ގޯސްވި، މި އަހަރުގެ ޖެނުއަރީ މަހުގެ ތެރޭގައި ކަމަށެވެ.

އެ މަޝްވަރާގެ ތެރެއިން ޕީއެންސީ މެމްބަރުން ހިމެނޭ ގޮތަށް ރައްޔިތުންގެ މަޖިލީހުގެ 40 މެމްބަރަކަށް ރިޝްވަތު ދީގެން، ރައީސް މުއިއްޒުގެ މައްޗަށް އިތުބާރު ނެތް ކަމަށް ފާސްކުރަން ނިންމި ކަމަށް ވޮޝިންޓަން ޕޯސްޓުން ބުނެފައިވެ އެވެ.

މެންބަރުންގެ އިތުރުން ރައީސް މުއިއްޒުގެ ވެރިކަން ވައްޓާލުމަަށް ފުލުހުންނާއި ސިފައިންގެ އެހީތެރިކަން ހޯދުމާއި ގުޅޭގޮތުންވެސް ރޯއިން ވަނީ އެމްޑީޕީއާ މަޝްވަރާކޮށްފައި ކަމަށް ވޮޝިންޓަން ޕޯސްޓުން ބުނެފައިވެ އެވެ. ދިވެހި ފުލުހުންނާއި ދިވެހި ސިފައިންގެ 10 އިސް އޮފިސަރުންނާއި ރާއްޖޭގައި ހަރަކާތްތެރިވާ ބާރުގަދަ ތިން ގޭންގަކަށް ފައިސާ ދޭން ނިންމި ކަމަށް ބުނެފައިވެ އެވެ.

ރައީސްގެ ވެރިކަން ވައްޓާލުމުގެ އެކަންކަން ރޯއަށް ހުށަހެޅީ އިދިކޮޅު ފަރާތްތަކުން ކަމަށާއި އެކަމަށް ބޭނުންވާ 92.5 މިލިއަން ރުފިޔާ ހޯދަން ވެސް ނިންމައިފައިވަނީ އިންޑިއާއިން ކަމަށް ވޮޝިންޓަން ޕޯސްޓުން ބުންޏެވެ.

ނަމަވެސް، ސިއްރިއްޔާތުގައި އެތައް މަހަކަށް ދިގުދެމިގެންދިޔަ ރޭވުންތަކަށް އަމަލީ ސިފައެއް ނުޖެއްސުނީ، ރައީސް މުއިއްޒު މަގާމުން ދުރުކުރަން އެކަށީގެންވާ އަދަދަށް މެމްބަރުން ނުލިބުމުން ކަމަށް ބުނެފައިވެ އެވެ.

އެ ރޭވުންތަކުގައި އިންޑިއާގެ ފަރާތުން އިސްކޮށް މަސައްކަތް ކުރީ، ޝިރީޝް ތޮރާތު ނަމަކަށް ކިޔާ ކުރީގެ ފުލުހަކާއި އިންޑިއާގެ ވެރިކަންކުރާ ޕާޓީ، ބީޖޭޕީގެ ކުރީގެ ތަރުޖަމާނެއް ކަމަށްވާ ސަވިއޯ ރޮޑްރީގްސް އެވެ. ތޮރާތަކީ، ވޮޝިންގްޓަންޕޯސްޓުން ބުނި ގޮތުގައި، ކުރީގެ ރައީސް މުހައްމަދު ނަޝީދުގެ ވެރިކަމުގައި، ދީނީ ހަރުކަށި ފިކުރާ ދެކޮޅަށް އެޑްވައިޒަރެއްގެ ގޮތުގައި މަސައްކަތް ކުރި މީހެކެވެ.

ވޮޝިންގްޓަންޕޯސްޓުން ބުނިގޮތުގައި، ރައީސް މުއިއްޒުގެ ގާތް މީހަކު ވަނީ، ތޮރާތު އާއި އިންޑިއާގެ ރޯ އޭޖެންޓުންނާ ދެމެދު ކުރި ބައެއް މުއާމަލާތްތައް އެ ނޫހާ ހިއްސާ ކޮށްފަ އެވެ. ނަމަވެސް، އެ މުއާމަލާތްތައް ހޯދި ގޮތެއް އެ މީހާ ހާމަކޮށްފައި ނުވާ ކަމަށް އެ ނޫހުން ބުންޏެވެ