226 މީހަކަށް ވަގުތީ ހިޔާވަހިކަމާއި ކާނާ ފޯރުކޮށްދީފިން: އެންޑީއެމްއޭ

އިއްޔެ މާލެއަށްކުރި ވިއްސާރައިގައި މުޅި މާލޭގައި ފެންބޮޑުވުމުގެ ސަބަބުން 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން މިއަދު ބުނެފި އެވެ.

އެންޑީއެމްއޭން މިއަދު ބުނީ މާލޭގައި ފެންބޮޑުވެގެން 500 އަށްވުރެ ގިނަ ތަނަކަށް ފެން ވަންނާތީ ރިޕޯޓުކޮށްފައިވާ ކަމަށެވެ.

ފެން ބޮޑުވުމުގެ ސަބަބުން 774 ތަނަކުން އެކިއެކި އެހީތެރިކަމަށް އެދި ރިޕޯޓުކޮށްފައިވާ ކަމަށާއި އޭގެ ތެރެއިން، 554 ރިކުއެސްޓަކީ ވެލި ބަސްތާ ޖަހައިދިނުމަށް ކަމަށް އެންޑީއެމްއޭން ބުންޏެވެ.

އަދި ޒަރޫރީ ބޭނުންތަކަށް ހުރަސްއެޅިގެން 53 ގެއަކުން ރިޕޯޓުކުރިއިރު އެ ތަންތަނުގެ ރެޕިޑް އެސެސްމަންޓު ހަދާފައިވާ ކަމަށާއި އޭގެ ތެރެއިން އާންމު ދިރިއުޅުމަށް ހުރަސްއެޅޭ ހާލަތުގައި ހުރި 36 ގެއަކުން 226 މީހަކަށް ވަގުތީ ބޯހިޔާވަހިކަން ފޯރުކޮށްދީ، ކެއިންބުއިމުގެ އެހީތެރިކަން ފޯރުކޮށްދީފައިވާ ކަމަށް އެންޑީއެމްއޭއިން ބުންޏެވެ.

މާލޭގެ އިތުރުން، ވިއްސާރައިގައި އިތުރު އަށް ރަށަކަށް އެކިވަރުގެ ގެއްލުންތައް ވެފައިވެއެވެ. އެ ގޮތުން؛

ފ. ނިލަންދޫގެ 80 އިންސައްތައިގައި ފެންބޮޑުވި
ދ. ކުޑަހުވަދޫގެ 10 ވަރަކަށް ގެއަށް ގެއްލުން ލިބުނު
ދ. މީދޫގެ 10 ވަރަކަށް ގެއަށް ގެއްލުން ލިބުނު
ފ. މަގޫދޫގެ 9 ގެއަކަށް ގެއްލުން ލިބި އެއް ގެއިން މީހުން ހުސްކުރި
އދ. މާމިނގިލީގެ ހަތަރު ގެއަކަށް ބޮޑެތި ގެއްލުންތަކެއް ލިބުނު
ކ. ގުރައިދޫގެ 60 ގެއަކަށް އެކިވަރުގެ ގެއްލުން ލިބުނު
ފ. ފީއަލީގެ އެއް ގެއިން މީހުން ހުސްކުރި
ކ. ހިންމަފުށީގެ 60 އިންސައްތަ ގޭގައި ފެންބޮޑުވި
މި ވިއްސާރައިގައި ރ. އިނގުރައިދުއާއި ށ. ނަރުދުއަށް ވެސް އިއްޔެ އުދައަރައި ބޮޑެތި ގެއްލުންތަކެއްވިއެވެ.