ރަށްރަށަށް ވައުދުވި ފްލެޓުތައް ހަދަން މި މަހު ކޮންޓްރެކްޓަރުން ހޯދަން އިއުލާންކުރާނަން: ރައީސް

ކ. ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މި އަހަރު ވެގެންދާނީ ގެދޮރުވެރިކަމުގެ މައްސަލަ ހައްލުކުރުމުގައި އަމަލީ ގޮތުން އެއް އަހަރެއްގެ ތެރޭގައި އެންމެ ގިނަ މަޝްރޫއުތައް ހިންގާނެ އަހަރަށް ކަމަށެވެ. އަދި ބިން ހިއްކައި، ޖާގަ އިތުރުކުރެވިފައިވާ ރަށްރަށުގައިވެސް ކުރިއަށް އޮތް އަހަރުތަކުގައި ގެދޮރުވެރިކަމުގެ މަޝްރޫއުތައް ހިންގަވާނެ ކަމަށް ވިދާޅުވިއެވެ.

”މި އަހަރަކީ ބޯހިޔާވަހިކަމުގެ އަހަރެއް. 2025 އަކީ ބޯހިޔާވަހިކަމުގެ އަހަރަކަށް ހަދާނަން. މި މަހުގެ ތެރޭގައި ބަޖެޓުގެ ތެރެއިން ކަނޑައަޅާފައި މި ހުރި، އަޅުގަނޑު ވައުދުވެފައި ހުރި ހުރިހާ ބޯހިޔާވަހިކަމުގެ މަޝްރޫއުތައް، ރަށްރަށުގައި ކުރިއަށް ގެންދިއުމަށް ކެމްޕޭން ތެރޭގައި، މެނިފެސްޓޯގައި ކަނޑައަޅާފައި ހުރި ހުރިހާ ބޯހިޔާވަހިކަމުގެ މަޝްރޫއުތައް ހިންގަދޭނެ ފަރާތްތައް ހޯދައި، އަމަލީ ގޮތުން މަސައްކަތް ކުރާނެ ކޮންޓްރެކްޓަރުން ހޯދުމަށް އެބަ އިއުލާން ކުރަން. މި ޖެނުއަރީ މަސް ތެރޭގައި،“ ރައީސް ވިދާޅުވި އެވެ.