އަމާޒަކީ މިފްކޯގެ ކޮރަޕްޝަން މުލުން ލުހެލުން: ރައީސް

މަސައްކަތް ކުރައްވަނީ ސަރުކާރުގެ މަސް ކުންފުނި، މިފްކޯގައި ޒަމާނުއްސުރެ ހުރި ކޮރަޕްޝަނުގެ އަމަލުތައް މުލުން ލުހެލުމަށް ކަމަށާއި އެ މަސައްކަތް ފައްޓަވާފައިވާ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒު ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި ނޫސްވެރިންނާ ބައްދަލުކުރައްވާ ވިދާޅުވީ މިފްކޯގައި ޒަމާންވީ ގޯސް ކަންތައްތަކެއް ހިނގާ ކަމަށާއި އެކަންކަން ހައްލުކުރައްވާނެ ކަމަށެވެ.

”އެތާ (މިފްކޯ) އެތެރޭގައި ޒަމާންވީ އެކިއެކި ގޯސް ކަންތައްތައް ހިނގާ. އަޅުގަނޑު ގަބޫލުކުރަނީ ކޮރަޕްޝަންގެ އަމަލުތަކެއްގެ ގޮތަށް ފެންނަ ކަންތައްތަކެއް. އަޅުގަނޑުމެން އެ ހުރިހާ ކަމެއް އެތަނުން މުލުން ލުހެލާނަން،“ ރައީސް މުއިއްޒު ވިދާޅުވި އެވެ.

ރައީސް މުއިއްޒު ވިދާޅުވީ މިފްކޯގެ ހިންގުން ހަރުދަނާ ކުރުމަށް އެ މަނިކުފާނު ވައުދުވެވަޑައިގެންނެވި ގޮތަށް ބޭރުގެ ސީއީއޯއެއް އައްޔަންކުރައްވާފައިވާ ކަމަށެވެ.

ރައީސް ވިދާޅުވީ މަސައްކަތް ކުރައްވަނީ މިފްކޯ ހަރުދަނާކޮށް، އެ ތަނުގެ އިސްރާފު ކުޑަކޮށް އަދި މަސްވެރިން ބޭނުންވާ ގޮތަށް މިފްކޯގެ މަސައްކަތްތައް ކުރިއަށް ގެންދިއުމަށް ކަމަށެވެ.