ރޭސް ކާރު އެކްސިޑެންޓް: ކާރު ދުއްވި އިކްރާމް ތިން މަހަށް ޖަލަށްލައިފި

މިދިޔަ އަހަރުގެ ޖުލައި މަހުގެ 31 ގައި ހުޅުމާލޭ 2ގެ ވިނަރެސް ފްލެޓްތައް ކައިރީގައި ހިނގި ނުރައްކާތެރި އެކްސިޑެންޓުގައި، ރޭސް ކާރު ދުއްވަންއިން އިބްރާހިމް އިކްރާމްގެ މައްވަށް ތިން މަހުގެ ޖަލު ހުކުމަކާއި 70،000 ރުފިޔާގެ ޖޫރިމަނާގެ އަދަބެއް ކުރިމިނަލް ކޯޓުން މިއަދު ކޮށްފި އެވެ.

މި މައްސަލައިގައި އެންމެފަހުން ބޭއްވި އަޑުއެހުމުގައި އިކްރާމް ވަނީ އޭނާގެ މައްޗަށް ދައުލަތުންކުރާ ދައުވާތަކަށް އިއުތިރާފުވެފަ އެވެ.

އެކްސިޑެންޓުގައި ސައިކަލުގައި އިން މީހާ ވިއްސައިގެން ގޮސް ސީރިއަސް އަނިޔާތަކެއް ލިބުނުއިރު، އެ މައްސަލާގައި ކާރު ދުއްވި މީހާ އާއި އެ ވަގުތު ކާރުގައި ތިބި އިތުރު ދެ މީހަކު ހައްޔަރުކުރި އެވެ. އެއީ:

ހ. ނޫރަންމާގެއާގެ/ އިކްރާމުއްރަހްމާން
މ. ލޭންޑްއޮފްގާޑަން/ އިބްރާހިމް އިކްރާމް
ގއ. ކަނޑުހުޅުދޫ/ އާޒާދުގެ، ޖިނާހް އިސްމާއިލް

އެ މީހުންގެ މައްޗަށް ދައުވާކޮށްދިނުމަށް އެދި ޕީޖީއަށް ފޮނުވީ މިދިޔަ މަހުގެ 14 ގަ އެވެ.

އޭގެ ތެރެއިން އިބްރާހިމް އިކްރާމްގެ މައްޗަށް ދައުލަތުން ހަ ދައުވާއެއް ކުރި އެވެ. އެއީ އަނިޔާއެއް ދިނުމުގެ ދައުވާ އާއި ފަރުވާލެއް ނެތި ކުރި ކަމަކުން މީހެއްގެ ހަށިގަނޑަށް ބޮޑު ގެއްލުމެއް ލިބިދާނެ ކަމުގެ ބިރެއް ކުރިމަތިކުރުމުގެ ދައުވާ އާއި މުދަލަށް ގެއްލުން ދިނުމުގެ ދެ ދައުވާއެއްގެ އިތުރުން އެކްސިޑެންޓްވުމުން ރިޕޯޓް ނުކުރުމުގެ ދައުވާ އަދި އެހީއަށް ބޭނުންވެފައިވާ މީހަކަށް އެކަށީގެންވާ ސަބަބެއް ނެތި އެހީ ފޯރުކޮށް ނުދިނުމުވެ.

އިކްރާމްގެ މައްޗަށް ދައުލަތުން އުފުލާފައިވާ ހަ ދައުވާއަށް އިއުތިރާފުވެ، ދައުލަތާ އެކު އިއުތިރާފު އެއްބަސްވުމެއްގައި ވަނީ ސޮއިކޮށްފައެވެ. އިއުތިރާފުގެ އެއްބަސްވުމުގެ ދަށުން ކުށުގެ އަދަބުތައް ވަނީ ޖޫރިމަނާގެ އަދަބަކަށް ބަދަލުކޮށްދީފަ އެވެ. ނަމަވެސް ފަރުވާލެއް ނެތި ކުރި ކަމަކުން މީހެއްގެ ހަށިގަނޑަށް ބޮޑު ގެއްލުމެއް ލިބިދާނެ ކަމުގެ ބިރެއް ކުރިމަތިކުރުމުގެ ކުށަށް ވަނީ ޖޫރިމަނާގެ އިތުރުން ތިން މަހުގެ ޖަލު ހުކުމެއް ކަނޑައަޅައިފަ އެވެ. އެއްބަސްވުމުގެ ދަށުން ދައުލަތުން ވަނީ މުދަލަށް ގެއްލުން ދިނުމުގެ ދެ ދައުވާ އަނބުރާ ގެންގޮސްފަ އެވެ.

އިއުތިރާފުގެ އެއްބަސްވުމުގެ ދަށުން އިކްރާމްގެ މައްޗަށް ކުރި ދައުވާ އާއި އިއްވި އަދަބު:

– މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުމުގެ ކުށުގެ ދައުވާ: ތިން މަސް ދުވަހަށް ޖަލަށްލުމާ އެކު 19،200ރ. އަށް މަސް ތެރޭ ދައްކަން

– އަނިޔާއެއް ދިނުމުގެ ކުށުގެ ދައުވާ: ޖަލު އަދަބު ޖޫރިމަނާއަށް ބަދަލުކޮށް 44،800ރ. އަށް މަސް ތެރޭ ދައްކަން

– އެކްސިޑެންޓްވުމުން އެ ކަމުގެ ރިޕޯޓް ނުކުރުމުގެ ކުށުގެ ދައުވާ: 5،400ރ. ޖޫރިމަނާގެ ގޮތުގައި އަށް މަސް ތެރޭ ދައްކަން

– އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއް ނެތި އެހީތެރިކަން ފޯރުކޮށްނުދިނުމުގެ ކުށުގެ ދައުވާ: 600ރ. އަށް މަސް ތެރޭ ދައްކަން

– މުދަލަށް ގެއްލުން ދިނުމުގެ ކުށުގެ ދެ ދައުވާ: ބޭސްފަރުވާއަށް 24،000ރ. އަދި ސައިކަލަށް ލިބުނު ގެއްލުންތަކަށް 95،000ރ. އިކްރާމް ދައްކާފައިވާތީ ދެ ދައުވާ އަނބުރާ ގެންދިޔަ

އެކްސިޑެންޓާ ގުޅިގެން އިކްރާމް ދައުވާއަށް އިއުތިރާފްވީ ނަމަވެސް، އަނެއް ދެ މީހުން ވަނީ ދައުވާތަކަށް އިންކާރުކޮށްފަ އެވެ. ދައުލަތުން ވަނީ އެ ދެ މީހުންނާ ދެކޮޅަށް ހެކި ވެސް ހުށަހަޅައިފަ އެވެ.