ރަޝިއާ ޔޫކްރެއިން ހަނގުރާމައިގައި އެއްވެސް ކޮޅަކަށް ތާއީދެއް ނުކުރަން: ހަލީލް

ރަޝިއާ އާއި ޔޫކްރެއިނުން ކުރަމުންދާ ހަނގުރާމައިގައި، ރާއްޖޭން ޔޫކްރޭނަށް ތާއީދުކޮށްފި ކަމަށް ބުނެ ދެއްކެވޭ ވާހަކަތައް، ފޮރިން މިނިސްޓަރު ޑރ. އަބްދުﷲ ހަލީލް މިއަދު ދޮގުކުރައްވައިފި އެވެ.

ހަލީލު އެގޮތަށް ވިދާޅުވީ ރައީސް ޑރ. މުހައްމަދު މުއިއްޒު މިހާރު އެސްޓޯނިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ގައުމުގެ ގާނޫނު ހަދާ މަޖިލީހުގެ އިސްވެރިންނާ އެކު ކުރެއްވި މަޝްވަރާތަކަށް ފަހު، އެތަނުން ކުރި ޕޯސްޓަކާ ގުޅިގެންނެވެ.

އެ ޕޯސްޓުގައި އެސްޓޯނިއާގެ ގާނޫނު ހަދާ މަޖިލީހުން ބުނެފައިވަނީ ސަލާމަތާއި ބައިނަލްއަގުވާމީ ގާނޫނުތައް ދިފާއުކުރުމުގެ އިތުރުން ޔޫކްރޭނަށް ތާއީދުކުރުމާ ގުޅޭ ގޮތުން މަޝްވަރާ ކުރި ކަމަށެވެ. އަދި އދ. ގައި ޔޫކްރޭނަށް ރާއްޖޭން ކުރާ ތާއީދަށް އެ ޕޯސްޓުގައި ވަނީ ޝުކުރު އަދާކޮށްފަ އެވެ.

ނަމަވެސް އެ ވާހަކަ ދޮގުކުރައްވައި ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއިން ބައިނަލްއަގުވާމީ މައިދާނުގައި ގެންގުޅޭ ސިޔާސަތު ބަދަލުނުވާ ކަމަށެވެ.

ހަލީލު ވިދާޅުވީ ރާއްޖޭގެ ސިޔާސަތު ބަދަލުނުވާކަން އދ. ގައި ރާއްޖޭން ވޯޓު ދެމުންދާ ގޮތުން އެކަން ސާފުވާނެ ކަމަށެވެ.

”ކުދި ގައުއުމުތަކުގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް،“ ހަލީލު ވިދާޅުވި އެވެ.

ރާއްޖޭގެ ހާރިޖީ ސިޔާސަތު ބިނާވެގެންވަނީ އެއްވެސް ގައުމަކާ ހަތުރުވެރި ނުވެ ދިވެހިންގެ ލާބަ އާއި މަންފާ ލިބޭ ގޮތަށް، ރާއްޖޭގެ މިނިވަންކަމާ ސިޔާދަތަށް ބުރޫ ނާރާ ގޮތަށް ހުރިހާ ގައުމަކާ އެކީ ވެސް ގާތް ގުޅުން ބޭއްވުމުގު މައްޗަށް ކަމަށް ހަލީލު ވިދާޅުވި އެވެ.