ބާރާއި ނުފޫޒުން ރައްޔިތުންނާއި ދައުލަތުގެ މުދަލުން ތަނަވަސްކަން ހޯދުމަކީ ހަރާމް ކަމެކެވެ.

ނުފޫޒާއި ބާރު ބޭނުންކޮށްގެން ނާޖާއިޒު ގޮތުގައި އާންމު ފަރުދުންގެ މުދަލުންނާއި ދައުލަތުގެ މުދަލުން ތަނަވަސްކަން ހޯދުމަކީ ހަރާމް ކަމެއް ކަމަށް މިއަދުގެ ހުކުރު ހުތުބާގައި ބުނެފި އެވެ.

”ބާތިލުގޮތުގައި މުދާ ކެއުން“ މި މައުޟޫއަށް މިއަދު ދިން ހުތުބާގައި ބުނީ، މުދަލަކީ މާތް ﷲ އެކަލާނގެ އަޅުންނަށް ދެއްވާ ބޮޑު ނިއުމަތެއް ކަމަށާއި އެއީ އެކަލާނގެ އަޅުތަކުން އިމްތިހާނު ކުރެއްވުމަށްޓަކައި ލައްވައިފައިވާ ސަބަބެއް ވެސްމެ ކަމަށެވެ. އެގޮތުން އިންސާނާ ހަލާލު ގޮތުގައި މުދާ ހޯދައިފި ނަމަ އަދި ހަލާލު ގޮތުގައި ވުނަކޮށްފިނަމަ، އަދި ހަލާލު ގޮތުގައި ހޭދަކޮށްފި ނަމަ، އެއީ އޭނާއަށް ބާއްޖަވެރިކަން ގެނެސްދޭނެ އެއްޗެއް ކަމަށް ބުންޏެވެ.

ހުތުބާގައި ބުނީ، މުދަލަކީ އިންސާނާގެ ހަޔާތުގައި މުހިންމު އެއްޗަކަށްވާއިރު، އެއާ މެދު ނުހަނު ބޮޑަށް ރައްކާތެރިވާން ޖެހޭނެ ކަމަށާއި ނޫން ނަމަ ހެޔޮ މަގުން ކަސިޔާރުވެދާނެ ކަމަށެވެ. އަދި މުދަލުގެ ފިތުނައިން ރައްކައުތެރިވުމަށް މާތް ރަސޫލާ ހަދީޡް ކުރައްވާފައިވާ ކަމަށްވެސް ބުންޏެވެ.

އެހެން މީހުންގެ މުދަލަށް އަރައިގަތުން އިސްލާމް ދީނުގައި ހަރާމްކުރައްވާފައިވާކަން ފާހަގަކޮށް ހުތުބާގައި ބުނީ، މުދަލަށް ހިޔާނަތްތެރިވުމާއި މުދާ ފޭރުމާއި މުދަލުން ވައްކަންކުރުމާއި ޓެކުމާއި ރިޝްވަތު ނެގުމާއި ރިބާ ކެއުމާއި ޖުވާކުޅުން ފަދަ ކަންކަމުން މުދާ ހޯދުމަކީ މި ދީން މަނާކުރާ ކަންތައްތަކެއް ކަމަށެވެ. އަދި ނުފޫޒާއި ބާރު ބޭނުންކޮށްގެން ނާޖާއިޒު ގޮތުގައި އާންމު ފަރުދުންގެ މުދަލުންނާއި ދައުލަތުގެ މުދަލުން ތަނަވަސްކަން ހޯދުމަކީ ހަރާމް ކަމެއް ކަމަށްވެސް ބުންޏެވެ.

ކީރިތި ރަސޫލާ ހަދީޡް ކުރައްވާފައިވާ ބަސްފުޅެއްގެ މާނައިގައިވެ އެވެ.

”ހަމަކަށަވަރުން ﷲގެ މުދަލުން (އެބަހީ: މުސްލިމުންގެ މުދަލުން) ހައްގު ނޫން ގޮތުގައި ބޭނުންކޮށް އުޅޭ މީހުންނަށް، ގިޔާމަތް ދުވަހުން ނަރަކަ ހުއްޓެވެ.“

ހުތުބާގައި ބުނީ، ބާތިލު ގޮތުގައި މުދާ ކެއުމުގެ ތެރޭގައި ތިމާ ކުރަންޖެހޭ މަސައްކަތް ރަނގަޅަށް ނުކުރުމާއި މަސައްކަތުގެ ގަޑީގައި ވަގުތު ބޭކާރުކުރުންވާ ކަމަށެވެ. އަދި ދައުލަތުގެ މުދަލަށް ހިޔާނާތްތެރިވުމުގެ ތެރޭގައި ރިޝްވަތު ނެގުންވާ ކަމަށާއި ރިޝްވަތަކީ ވަރަށް ނުބައި، ކަންކަން ފާސިދުކުރާ ވަބާއެއް ކަމަށް ބުންޏެވެ.

ހުތުބާގައި އިތުރަށް ބުނީ، ރިޝްވަތަކީ ހައްގު ބާތިލަށް ހަދައި، އަދި ބާތިލު ހައްގުކަމަށް ފުރޮޅައިލާ އާލަތެއް ކަމަށެވެ. އަދި ދުނިޔެމަތީގައި އެކަމުގެ އުގޫބާތުން ސަލާމަތްވި ނަމަވެސް އާހިރަތުގެ އުގޫބާތުން އެ މީހާ ސަލާމަތެއް ނުވާނެ ކަމަށްވެސް ބުންޏެވެ.