މުދަލު ޒަކާތުގެ ނިޞާބު 8،000 ރުފިޔާއަށް ދަށްކޮށްފި

މުދަލު ޒަކާތް ދައްކަން ވާޖިބުވާ ނިޞާބު އަނެއްކާ ވެސް ޒަކާތު ހައުސްއިން ދަށްކޮށްފިއެވެ.

ޒަކާތު ހައުސްއިން އެންމެ ފަހުން މުދަލު ޒަކާތުގެ ނިޞާބަށް ގެނެސްފައިވަނީ މިދިޔަ އޮކްޓޫބަރުގެ މަހުގެ 10ގައެވެ. އޭރު ޒަަކާތުގެ ނިޞާބު ކުޑަކުރީ 9353.40 ރުފިޔާއިން 9240.35 ރުފިޔާއަށެވެ.

ނަމަވެސް އިއްޔެ ޒަކާތު ހައުސްއިން ވަނީ މުދަލު ޒަކާތް ނެރުން ވާޖިބުވާ ނިޞާބުގެ މިންވަރަކީ ރިހީ ގުރާމަކަށް 14.79 ރުފިޔާގެ ރޭޓުން 595 ގުރާމަށްވާ 8،800 ރުފިޔާ ފަސް ލާރި ކަމަށް ކަނޑައަޅައިފަ އެވެ.

ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ.

ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަންޖެހޭ ދިވެހި ފައިސާގެ މިންވަރު ވެސް ބަދަލުވާނެއެވެ.

މުދަލު ޒަކާތުގެ ނިޞާބަކީ، ތިމާގެ މުދަލުގައި އެ މިންވަރެއް ހަމަވުމުން އެއިން މުދަލު ޒަކާތް ނެރުން ވާޖިބުވާ އެންމެ މަދު މިންވަރެވެ.

ފާހަގަކޮށްލެވޭ ގޮތުގައި، މިދިޔަ އަހަރު މުދަލު ޒަކާތުގެ ގޮތުގައި 101 މިލިއަން ނުވަ ލައްކަ ތިރީސްނުވަހާސް ހަތްދިހަ ރުފިޔާ 15 ލާރި ވަނީ ލިބިފައިވާ ކަމަށް އިސްލާމިކް މިނިސްޓްރީން ވަނީ ބުނެފައެވެ.