ޖައިލަމްގެ މަރު: ވަޅި ހެރިކަމަށް ތުހުމަތުވާ ހުމައިދުގެ ބައި ދޫކޮށްލުމުން ފަނޑިޔާރުގެ ސުވާލުތަކެއް

ހ. ހަންޑްރެންޑް ފްލާވާސް، ޖައިލަމް އަހްމަދު ޝާކިރު މަރާލި ކަމުގެ ދައުވާ ދައުލަތުން އުފުލާފައިވާ މުހައްމަދު ހުމައިދުގެ މައްޗަށް ދައުވާކުރުން ލަސް ކުރުމުންނާއި އޭނާގެ މައްޗަށް ކުށް ސާބިތުނުވާ މައްސަލަ ހައިކޯޓުގައި އިސްތިއުނާފުކުރުމުން، ހައިކޯޓުގެ ފަނޑިޔާރުންގެ ހޫނު ސުވާލުތަކެއް ދައުލަތަށް އަމާޒުވެއްޖެ އެވެ.

ޖައިލަމް މަރާލީ 21 އޭޕްރިލް 2015ގެ ރޭ، އޭނާގެ ގެ ކައިރީގައި ހުއްޓާ ވަޅިން ހަމަލާ ދީގެންނެވެ. އޭނާގެ ހަށިގަނޑުގެ 12 ތަނަކަށް ވަޅި ހަރާފައިވެ އެވެ.

އެ މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާ ހަތަރު މީހެއްގެ މައްޗަށް އުފުލި އެވެ. އެއީ ހުމައިދުގެ އިތުރުން ނަސީބު ސައީދު، އިސްމާއިލް އަނީގު އަދި އަލީ އިރުފާނެވެ. އެ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމްކުރީ 10 މާޗު 2022ގަ އެވެ. އޭގެ ތެރެއިން ހުމައިދު ފިޔަވައި ދެން ތިބި ތިން މީހުންގެ ބައި، އެ އަހަރު ޖޫން މަހު ދައުލަތުން ހައި ކޯޓުގައި އިސްތިއުނާފުކުރި އެވެ.

މިއަދު ހައިކޯޓުގައި ބޭއްވި އެ މައްސަލައިގެ އަޑުއެހުމުގައި ހުމައިދުގެ ބައި އިސްތިއުނާފު ނުކުރި ސަބަބާ ގުޅޭ ގޮތުން ފަނޑިޔާރުން ސުވާލު ކުރެއްވުމުން ދައުލަތުން ވިދާޅުވީ ހުމައިދަށް ދައުވާކުރެވުނީ ވެސް މާ ފަހުން ކަމަށެވެ. ދައުވާކުރި ފަހުން އޭނާއާ ދެކޮޅަށް ހުށަހެޅި އެއްވެސް ހެއްކަކު ޝަރީއަތަށް ހެކިބަސް ނުދީ އޮތުމުން އޭނާއާ ދެކޮޅަށް ދައުލަތަށް ހުށަހެޅޭނެ އެއްޗެއް ނެތް ކަމަށެވެ،

”ހުމައިދު އޭރު ރާއްޖެ ދޫކޮށް ދަނީ. ހުމައިދުގެ ބަޔާން ވެސް ތަހުގީގަށް ނުނެގޭ. ހުމައިދު ރާއްޖެ ހަމަ އައުމާ އެކީ އޭނާގެ ބަޔާން ނަގައި، ދައުވާ އުފުލައި، ކްރިމިނަލް ކޯޓަށް މައްސަލަ ހުށަހެޅިން،“ ޕްރޮސެކިއުޓަ ޖެނެރަލް (ޕީޖީ) އޮފީހުގެ ސީނިއާ ޕަބްލިކް ޕްރޮސެކިއުޓަރު އާލިއާ ވިދާޅުވި އެވެ.

ނަމަވެސް ފަނޑިޔާރު ވިދާޅުވީ ތުހުމަތުކުރާ މީހާގެ ބަޔާން ނެގެން ދެން ތަހުގީގު މަޑުޖެހިފައި އޮތުމާއި ފިލައިގެން ބޭރަށް ދާން ފުރުސަތު ލިބުމާއި ބަޔާން ނުނެގޭތީވެ ދައުވާ ނުކުރެވިދާނެތޯ އެވެ.

”ބޮޑު މާ ސިންގާ [1 ފޫޓުގެ] ވަޅިއެއް ހިފައިގެން ހަމަލާ ދިނީ އޭނައޭ ތި ބުނަނީ. ދެން މި އުޅެނީ ސައިކަލުގައި އެ މީހަކު އުފުލުމާއި އަތުން ޖެހުމާ މި ކަހަލަ ތުހުމަތުތައްވާ މީހުން. ވަޅިން ހަމަލާ ދިނޭ ބުނާ މީހާއަށް ދައުވާނުކޮށް އެހާ ލަސްކުރީ،“ މަޒީދު ވިދާޅުވި އެވެ.

”ހުމައިދުގެ ބަޔާން ނުނެގެންޏާ، އިއުތިރާފު ނުވެ އޮތިއްޔާ އިތުރު ހެކި ހޯދައި ދައުވާ ނުކުރެވެންވީ ކީއްވެ؟ އެ މީހެއްގެ ބަޔާން ނުދެންޏާ ދައުލަތަށް ދައުވާ ނުއުފުލޭ ގޮތަށްތޯ ގާނޫނު އޮންނަނީ؟ ކިހިނެއްތޯ ގާނޫނު ދަންނަނީ މި ކަން؟“ ރިޔާސަތުގައި އިންނެވި ފަނޑިޔާރު މަޒީދު ތަކުރާރުކޮށް ސުވާލުކުރެއްވި އެވެ.

ދައުލަތުން ވިދާޅުވީ ޖިނާއީ އަދުލުގެ ނިޒާމު ތަރުތީބުކޮށްފައި އޮންނަ ގޮތުން ޕީޖީއަށް މައްސަލައެއްގައި ދައުވާ ކުރެވޭނީ ތަހުގީގުކުރާ އިދާރާއަކުން ތަހުގީގުކޮށް ނިންމައި އެ އޮފީހަށް ފޮނުވުމުން ކަމަށެވެ. އަދި ގައިރު ހާޒިރުގައި ޖިނާއީ ޝަރީއަތެއް ނުހިންގޭނެކަން ވެސް ފާހަގަކުރެއްވި އެވެ.

މިއަދު ބޭއްވި އަޑުއެހުން ނިންމަައިލީ ހުމައިދުގެ ބައި ވެސް ހިމެނޭ ގޮތަށް ދަށު ކޯޓުގެ ޝަރީއަތް ނިންމި ގޮތުގެ ރިޕޯޓާއި ގަޒިއްޔާތަކުގެ ލިޔެކިޔުންތައް ކޯޓަށް ހުށަހަޅަން އެންގުމަށް ފަހު އެވެ. ނަސީބާއި އަނީގަށް ވަކީލަކު ހަމަޖައްސަން ދެ ހަފުތާގެ ފުރުސަތެއް ދިނުމަށް ވެސް ޝަރީއަތުން ނިންމި އެވެ.