އެފްއޭއެމް ހިޔާނަތް: ބައްސާމް ދައުވާތަކަށް އިންކާރުކޮށްފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލްގެ މައްޗަށްކުރާ މަނީ ލޯންޑަރިންނާއި ހިޔާނާތުގެ ދައުވާއަށް އޭނާ އިންކާރުކޮށްފި އެވެ.

ދައުލަތުން، ބައްސާމްގެ މައްޗަށް ހިޔާނާތުގެ ދައުވާ އާއި މަނީ ލޯންޑްރިންގެ ދައުވާ ދައުލަތުން ކުރަނީ އެފްއޭއެމްއަށް 2018 ވަނަ އަހަރު ފީފާއިން ދިން ފައިސާގެ އިތުރުން 9،999 ޑޮލަރު ބައްސާމްގެ އަމިއްލަ އެކައުންޓަށް ޖަމާކޮށް، ބޭނުންކުރި ކަމަށް ހެކިހުރި ކަމަށް ބުނެ އެވެ.
ކުރިމިނަލް ކޯޓުގައި މިއަދު ބެއްވި މި މައްސަލައިގެ އަޑުއެހުމުގައި ދައުލަތުން ވަނީ ބައްސާމުގެ މައްޗަށް ދައުވާ އިއްވައިފައެވެ. ދައުލަތުން ދައުވާ އިއްވައި ނިމުމުން، ބައްސާމުގެ ވަކީލު އަލީ ނަދީމް ވިދާޅުވީ ދައުލަތުންކުރާ ދައުވާގައި ބަޔާންކޮށްފައިވާ ކަންކަން ބައްސާމް ނުކުރައްވާ ކަމަށާއި އެހެންކަމުން އެ ދައުވާތަކަށް އިންކާރުކުރާ ކަމަށެވެ.

ދައުވާއަށް ޖަވާބުދާރިވުމުގެ ކުރިން ނަދީމް ފުރަތަމަ އެދިވަޑައިގަތީ ލިޔެކިޔުންތައް ދިރާސާކުރަން އޭނާއަށް ފުރުސަތު ދެއްވުމަށެވެ. ނަމަވެސް ކުރިން ވެސް މިފަދަ ގިނަ ފުރުސަތުތަކެއް ދިފާއަށް ދެވިފައިވާތީ ފުރުސަތު ނުދެއްވުމަށް، މައްސަލަ ބައްލަވާ ގާޒީ އިސްމާއީލް ޝަފީއު ނިންމެވި އެވެ.

ބައްސާމްގެ އެކައުންޓަށް ފައިސާ ޖަމާކޮށްފައިވަނީ ”ސޭލްސް އޮފް ޑޮލާސް“ ނުވަތަ ޑޮލަރު ގަނެގެން ޖަމާކުރި ޑޮލަރު ކަމަށް އޮންނާތީ އެކަމާ ގުޅޭ ތަފުސީލު ދެއްވުމަށް ގާޒީ ސުވާލު ކުރެއްވި އެވެ. ނަމަވެސް ލިޔެކިޔުންތައް ދިރާސާނުކޮށް އެއަށް ޖަވާބު ދެއްވަން ދަތި ކަމަށް ވިދާޅުވެ ދިފާއީ ވަކީލު އެ ސުވާލަށް ޖަވާބެއް ނުދެއްވަ އެވެ.

މިއަދުގެ އަޑުއެހުން ނިންމައިލީ ދިފާއީ ހެކި ހުށަހެޅުމަށާއި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް 10 ދުވަހުގެ ފުރުސަތެއް ދިފާއަށް ގާޒީ ދެއްވުމަށް ފަހުގަ އެވެ.

ދައުލަތުން ވަނީ ދައުވާތަކާއި ގުޅިގެން މުދަލާއި ފައިސާ ދައުލަތަށް ނަގައިދިނުމަށް ކޯޓުގައި އެދިފަ އެވެ. އެގޮތުން މި ހިޔާނާތުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ 1,200,000 ޑޮލަރު ބައްސާމުގެ އަތުން ނަގައިދިނުމަށް ދައުލަތުން ވަނީ އެދިފަ އެވެ.