އިންޑިއާގައި އަންހެނަކު ރޭޕްކޮށް އަންދާލައިފި، ކުށް ކުރުމުގައި އިސްކޮށް ހުރީ ޅިޔަނު!

އިންޑިއާގެ އުއްތަރަ ޕްރަދޭޝްގެ ޑިސްޓްރިކްޓެއްގައި އަންހެނަކު ގޭންގު ރޭޕްކޮށް، މަރާލުމަށްފަހު އަންދާލައިފި އެވެ.

ފުލުހުންނާ ހަވާލާދީ އިންޑިއާގެ މީޑިއާތަކުން ބުނެފައިވާ ގޮތުން އުމުރުން 21 އަހަރުގެ އެ އަންހެން މީހާ ރޭޕް ކޮށްފައިވަނީ އޭނާގެ ޅިޔަނާއި އިތުރު ދެ މީހަކު ވެގެންނެވެ. އެ މައްސަލައިގައި ޅިޔަނު ހައްޔަރުކޮށްފައިވާ އިރު، އަނެއް ދެ މީހުން ވަނީ ފިލައިފަ އެވެ.

މިކަން ފަޅާ އެރީ އަންހެން މީހާ ގެއްލިގެން އޭނާގެ އާއިލާ އިން މިދިޔަ ޖަނަވަރީ މަހުގެ 23 ވަނަ ދުވަހު ފުލުހުންނަށް ރިޕޯޓް ކުރުމުން ހިންގި ތަހުގީގުންނެވެ.

ފުލުހުން ބުނި ގޮތުގައި އެ މައްސަލައިގައި ކުރި ތަހުގީގުން ޅިޔަނު އެކަން ކުރީ އޭނާއާ ކައިވެނިކުރަން ނުގަބޫލުވުމުން ކަމަށް އެނގިފައިވާ ކަމަށެވެ. އެގޮތުން އެ އަންހެން މީހާ ގެއިން ނެރިގެން ގެންގޮސް ގޭންގް ރޭޕްކޮށް، ހާސްކޮށްލައިގެން މަރާލި ކަމަށާއި އަދި އެއަށްފަހު ހެކި ނައްތާލުމަށް ހަށިގަނޑު އަންދާލި ކަމަށްވެސް ބުންޏެވެ.

މި ހުރިހާ ކަމަކަށް ޅިޔަނު ވަނީ އިއުތިރާފުވެފަ އެވެ.