ކައްކާ އާއި ހެލްޕަރާ ދެމެދު ހިންގި މާރާމާރީ: ކައްކާ ހައްޔަރުކޮށްފި، ހެލްޕަރު އައިސީޔޫގައި

މާވެޔޮމަގުގައި ހުންނަ ކެފޭއެއްގެ ތެރޭގައި އެ މާރާމާރީ ހިންގާފައިވަނީ އެ ކެފޭގެ ކައްކާއާއި ބަންގުލަދޭޝްއަށް ނިސްބަތްވާ ހެލްޕަރާ ދެމެދު އެވެ. އެ ދެ މީހުންގެ ދެމެދު މާރާމާރީ ހިންގީ ކީއްވެގެން ކަމެއް ނޭނގެ އެވެ.

ފުލުހުން މިއަދު ބުނީ، މާރާމާރީއާ ގުޅިގެން ނޭޕާލުގެ ފިރިހެނެއް ކަމަށްވާ ސިދާތާ ގުރުން، 24އ. ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ. އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށްވެސް ފުލުހުން ބުންޏެވެ.

އެ މާރާމާރީގައި އަނިޔާވި ބަންގްލަދޭޝްގެ މީހާގެ ހާލު ސީރިއަސް އެވެ. އޭނާއަށް ފަރުވާ ދެމުންދަނީ އައިޖީއެމްއެޗްގެ އައިސީޔޫގަ އެވެ.