އެސްޓީއޯ އިން މިހާރު ތާޒާ ލުނބޯ ލިބެން ހުންނާނެ, ކިލޯއެއް 40 ރުފިޔާއަށް

އެސްޓީއޯ އިން ގެނައި ލުނބޯ ޝިޕްމަންޓް ވިއްކަން ފަށައިފި އެވެ.

އެސްޓީއޯ ޕީޕަލްސް ޗޮއިސް އިން މިއަދު ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ ތާޒާ އަދި ރަހަމީރު ލުނބޯ މިހާރު އެ ފިހާރައިން ލިބެން އެބަހުރި ކަމަށެވެ.

އެސްޓީއޯ އިން ލުނބޯ ވިއްކަނީ ކިލޯއެއް 40 ރުފިޔާއަށެވެ. އެއް ކާޓަން 145 ރުފިޔާއަށް ވިއްކަމުންދާއިރު, ފަސް ކާޓަން ވިއްކަމުންދަނީ 135 ރުފިޔާއަށެވެ. އޭގެ އިތުރުން 5 ކިލޯގެ ފޮށިވެސް ދަނީ ވިއްކަމުންނެވެ.

އެސްޓީއޯ އިން ލުނބޯ ގެނެސް ވިއްކަން ފެށި އިރު, ބާޒާރުގައި ލުނބޯ އަގު އުޅެނީ ކިލޯއެއް 60 ރުފިޔާއަށެވެ.

ކުރިއަށް އޮތް ރޯދަ މަހަށް ބޭނުންވާ މުދާ ދަތިކަމެއްނެތި ލިބޭނެ އިންތިޒާމު ހަމަޖެއްސުމަށް އެސްޓީއޯ އިން ދަނީ ދުރާލާ ތައްޔާރުވަމުންނެވެ.

އެގޮތުން ބާޒާރުގައި އަގު މައްޗަށްދާ ބާވަތްތައް ދެނެގަނެ, ދުވެހުން ދުވަހަށް ބާޒާރުގެ އަގުތައް އެ ކުންފުނިން ދަނީ މޮނީޓާކުރަމުންނެވެ.