ޑުރަގް މައްސަލައެއްގައި ކެނެޑާގެ 4 މީހަކަށް ޗައިނާ އިން މަރުގެ އަދަބު ދީފި، މައްސަލަ ހޫނުވެއްޖެ

ޑުރަގާ ގުޅޭ ކުށްތަކެއްގައި ކެނެޑާގެ ހަތަރު މީހަކަށް ޗައިނާ އިން މަރުގެ އަދަބު ދިން މައްސަލަ ހޫނުވެއްޖެ އެވެ.

ރިޕޯޓްތައް ބުނާ ގޮތުން ޑުއަލް ސިޓިޒަންޝިޕް އޮންނަ އެ މީހުންނަށް މަރުގެ އަދަބު ދީފައިވަނީ މި އަހަރު ކުރީކޮޅެވެ. އެ މައްސަލަ ހޫނުވީ އެ މީހުންނަށް މާފު ދޭން ކެނެޑާ އިން ތަކުރާރުކޮށް އެދިފައިވާ އޮތްވައި މަރުގެ އަދަބު ދިނުމުންނެވެ.

އެގޮތުން ކެނެޑާގެ ފޮރިން މިނިސްޓަރު މެލަނީ ޖޮލީ ވަނީ ޗައިނާގެ އެ އަމަލު ހަރުކަށި އިބާރާތުން ކުށްވެރިކޮށްފަ އެވެ. އެ ވާހަކަތަކާ ގުޅިގެން ކެނެޑާގައި ހުންނަ ޗައިނާގެ އެމްބަސީން ވަނީ ”ޒިންމާދާރުކަން ކުޑަ ވާހަކަތައް ދެއްކުން ހުއްޓާލުމަށް“ ގޮވާލައިފަ އެވެ.

ޗައިނާގެ ފޮރިން މިނިސްޓްރީން ވަނީ އެ މީހުންނަށް މަރުގެ އަދަބު ދީފައިވަނީ ގާނޫނާ އެއްގޮތަށް ކަމަށް ބުނެފަ އެވެ. އެގޮތުން އެ މީހުން އެ ކުށްކުރިކަން ސާބިތު ކުރެވޭ ވަރަށް ހެކި ލިބިފައިވާ ކަމަށް ބުންޏެވެ.

ޑުރަގާއި ކޮރަޕްޝަން އަދި ޖާސޫސު ކުރުން ފަދަ ބޮޑެތި ކުށްތަކަށް ޗައިނާ އިން މަރުގެ އަދަބުދެ އެވެ. ނަމަވެސް ބިދޭސީންނަށް މަރުގެ އަދަބު ތަންފީޒުކުރުމަކީ މަދުން ނޫނީ ހިނގާ ކަމެއް ނޫނެވެ.

ޗައިނާ އިން މަރުގެ އަދަބު ދޭ މިންވަރު ސިއްރުކުރެވިފައިވީ ނަމަވެސް، އިންސާނީ ހައްގުތަކުގެ ޖަމާއަތްތަކުން ބުނާ ގޮތުން ޗައިނާ އަކީ ދުނިޔޭގައި އެންމެ ގިނައިން މަރުގެ އަދަބު ދޭ އެއް ގައުމެވެ.