ކޮމިއުނިޓީ ޕާޓީ އުފެއްދުމަށް ދިން ހުއްދަ އީސީން ބާތިލުކޮށްފި

”މޯލްޑިވްސް ކޮމިއުނިޓީ ޕާޓީ“ގެ ނަމުގައި ސިޔާސީ ޕާޓީއެއް އުފެއްދުމަށް އިލެކްޝަންސް ކޮމިޝަން (އީސީ) އިން ދިން ހުއްދަ ބާތިލުކޮށްފި އެވެ.

އެ ނަމުގައި ސިޔާސީ ޕާޓީއެއް އުފެއްދުމަށްޓަކައި ކުރަންޖެހޭ މަސައްކަތްތައް ކުރިއަށްގެންދިއުމުގެ ހުއްދަ އީސީން ދީފައިވަނީ ގ.ކްރެބްޓްރީ، އަލީ އަހުމަދަށެވެ. އީސީން އޭނާއަށް އެ ހުއްދަ ދީފައިވަނީ މީގެ ހަތަރު މަސް ކުރިންނެވެ.

އީސީން ވަނީ ޕާޓީ އުފެއްދުމަށް ބޭނުންވާ ތިންހާސް މީހުންގެ ސޮއި ހޯދުމަށާއި، ޕާޓީ އުފެއްދުމަށްޓަކައި ކުރަންޖެހޭ އެހެނިހެން ކަންތައްތައް ކުރިއަށް ގެންދިއުމުގެ ހުއްދަ އާއިއެކު އެ ޕާޓީ ރަޖިސްޓްރީ ކުރުމަށް ބޭނުންވާ 3000 މީހުންގެ ފޯމު ހުށަހެޅުމަށް ތިން މަސް ދުވަހުގެ މުހުލަތެއް ދީފަ އެވެ.

ނަމަވެސް އެނގިފައިވާ ގޮތުގައި 3،000 ފޯމު ހުށަހެޅިފައިނުވާތީ އީސީން ވަނީ އަލީ އަހުމަށް ދިން ހުއްދަ ބާތިލުކޮށްފަ އެވެ.

އެގޮތުން އެ ހުއްދަ ބާތިލުކޮށްފައިވަނީ މިދިޔަ މަހުގެ މެދެއްހާ ހިސާބުގަ އެވެ.