އޭޕްރިލް 3, 2025

އެންސްޕާ އިން ކުރި ހަރަދު އިތުރުވެއްޖެ، އެކަމަކު ތެރަޕީ ފައިސާކޮޅު ނުލިބި ލަސްވާ މައްސަލަ ބޮޑު!

ނެޝަނަލް ޕްރޮޓެކްޝަން އެޖެންސީ (އެންސްޕާ) އިން މި އަހަރުގެ މިހާތަނަށް 733 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފި އެވެ.

ފިނޭންސް މިނިސްޓްރީން އިއްޔެ ހާމަކޮށްފައިވާ ސަރުކާރުގެ ހަރަދާއި އާމްދަނީގެ ތަފާސްހިސާބުތައް ދައްކާ ގޮތުން އެންސްޕާ އިން މި މަހުގެ 13 ވަނަ ދުވަހުގެ ނިޔަލަށް ހަރަދުކޮށްފައިވާ 733 މިލިއަން ރުފިޔާއަކީ މިދިޔަ އަހަރުގެ އެ މުއްދަތުގައި ހަރަދުކުރި 596 މިލިއަން ރުފިޔާއަށްވުރެ 137 މިލިއަން އިތުރު އަދަދެކެވެ.

މި އަހަރަށް މަޖިލީހުން ފާސްކޮށް ދީފައިވަނީ 56.6 ބިލިއަން ރުފިޔާގެ ބަޖެޓެކެވެ. އޭގެ ތެރެއިން އެންސްޕާއަށް އެކަނި 3.9 ބިލިއަން ރުފިޔާގެ ބަޖެޓެއް ހިމަނާފައިވެ އެވެ.

އޭގެ ތެރެއިން ސޯޝަލް ވެލްފެއާގެ ކަންކަމަށް އެކަނި 2 ބިލިއަން ރުފިޔާ ހިމަނާފައިވާއިރު، ނުކުޅެދުންތެރިކަން ހުންނަ ފަރާތްތަކަށް ތެރަޕީގެ އެހީ ދިނުމަށް 707.6 މިލިއަން ރުފިޔާ ހިމަނާފައިވެ އެވެ. އެއީ ޑިސްއެބިލިޓީ އެއިޑްއަށް 635.7 މިލިއަން ރުފިޔާ އާއި ޑިސްއެބިލިޓީ ތެރަޕީއަށް 71.9 މިލިއަން ރުފިޔާ އެވެ.

އެންސްޕާ އިން ކުރި ހަރަދު އިތުރުވެފައިވާ ކަމަށް ފިނޭންސް މިނިސްޓްރީން ބުނާއިރު، ކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕިއުޓިކް ހިދުމަތްތަކަށް ބޭނުންވާ ހަރަދު ހަމަޖައްސައިދިނުމަށް އެންސްޕާ މެދުވެރިކޮށް ދޭ މާލީ އެހީ ނުލިބި ލަސްވާ މައްސަލަ ވަނީ ބޮޑުވެފަ އެވެ.