ސައުދީ ފަންޑުން 385 މިލިއަން ނަގައިގެން 400 ފްލެޓް ހަދަނީ

ސައުދީ ފަންޑް ފޮ ޑިވެލޮޕްމަންޓް (ސައުދީ ފަންޑް) ލޯނު ފަންޑިންގެ ދަށުން ކުރިއަށް ގެންދިއުމަށް ހަމަޖެހިފައިވާ 400 އެފޯޑަބަލް ހައުސިން ޔުނިޓްގެ މަޝްރޫއު ފަށައިފި އެވެ.

އެ މަޝްރޫއު ފައްޓަވައިދެއްވީ ހުޅުމާލެ ދެވަނަ ފިޔަވަހީގައި މިއަދު ބޭއްވި ރަސްމިއްޔާތެއްގައި ސައުދީ ފަންޑުގެ އެންމެ އިސްވެރިޔާ އަދި ސީއީއޯ ސުލްތާން ބިން އަބްދުލްރަހުމާން އަލް މަރްޝަދާއި ފިނޭންސް މިނިސްޓަރު މޫސާ ޒަމީރެވެ.

މި މަޝްރޫއުއަށް ސައުދީ ފަންޑުން ދީފައިވަނީ 25 މިލިއަން އެމެރިކާ ޑޮލަރު (385 މިލިއަން ރުފިޔާ)ގެ ލޯނެކެވެ.

ކޮންސްޓްރަކްޝަން މިނިސްޓްރީން މިއަދު ބުނީ، މި މަޝްރޫއު ވެގެންދާނީ ރައީސް ޑރ. މުހައްމަދު މުއިއްޒުގެ އެންމެ މުހިންމު އެއް ވައުދުފުޅު ކަމަށްވާ ކޮންމެ ރައްޔިތަކަށް ބޯހިޔާވަހިކަމުގެ ފުރުސަތު ފަހިކޮށްދެއްވުމުގެ ސިޔާސަތުގެ ތެރެއިން ކުރިއަށް ގެންދިއުމަށް ހަމަޖެހިފައިވާ އެއް މަޝްރޫއު ކަމަށެވެ.

މި މަޝްރޫއުގެ މިހާރު ކުރިއަށްދަނީ ކޮންސަލްޓަންސީ ފާމްއެއް ހޮވުމުގެ މަރުހަލާ ކަމަށާއި މި އަހަރުގެ ފަހު ކުއާޓަރުގައި އަމަލީ މަސައްކަތް ފެށިގެންދާނެ ކަމަށްވެސް މިނިސްޓްރީން ބުންޏެވެ.