ޓެކްސް ނުދައްކާ ކުންފުނިތަކުގެ ލިސްޓުގައި މަޝްހޫރު ލިޓަސް ގުރޫޕުގެ ދެ ކުންފުންޏެއް!

ރާއްޖޭގެ މަޝްހޫރު ލިޓަސް ގުރޫޕްގެ ދެ ކުންފުންޏަކުން ޖީއެސްޓީ ނުދައްކާތީ މޯލްޑިވްސް އިންލޭންޑް އެންޑް ރެވެނިއު އޮތޯރިޓީ (މީރާ) އިން އެ ދެ ކުންފުނީގެ ނަން އާންމުކޮށްފި އެވެ.

މީރާއިން މިދިޔަ ބުރާސްފަތި ދުވަހު ވަނީ މިދިޔަ އަހަރުގެ ނޮވެމްބަރު މަހާ ހަމައަށް ޖީއެސްޓީ ނުދައްކާ 146 ފަރާތެއްގެ ނަން އާންމުކޮށްފަ އެވެ. އެ ފަރާތްތަކަކީ ޓެކްސްގެ ގޮތުގައި 600،000 އަށްވުރެ މަތި އަދަދެއް މީރާއަށް ދައްކަންޖެހި ނުދައްކައިވާ ފަރާތްތަކެވެ.

މީރާ އިން ނަން އާންމުކޮށްފައިވަނީ ލިޓަސް ކޮންސްޓްރަކްޝަން އާއި ލިޓަސް ޓްރޭޑިން ލިމިޓެޑްގެ އެވެ. ނަމަވެސް އެ ފަރާތްތަކުން ވަކިވަކިން ދައްކަންޖެހޭ ޓެކްސްގެ އަދަދެއް މީރާއިން ހާމައެއް ނުކުރެ އެވެ.

ފަވަލަ ބްރޭންޑުގެ އެއްޗެހި ވިއްކަނީ ލިޓަސް ކޮންސްޓްރަކްޝަންގެ ދަށުންނެވެ. އަދި ލިޓަސް ޓްރޭޑިންގެ ދަށުން ހިންގާ ތަންތަނުގެ ތެރޭގައ ލިޓަސް ކަނެކްޓް، އޮފީސް ޓެކް، ލިޓަސް ހޯމް ސެންޓަރު ހިމެނެ އެވެ.

ލިޓަސް ގުރޫޕުގެ ސީއީއޯއަކީ މުހައްމަދު ޒާހިދެވެ. ޖެނެރަލް މެނޭޖަރަކީ އަހުމަދު ޒާހިރެވެ.