ރާއްޖެ ވަޑައިގަތުމަށް އަންވަރަށް ރައީސް ދައުވަތު ދެއްވައިފި

މެލޭޝިއާގެ ބޮޑުވަޒީރު އަންވަރު އިބްރާހިމް ރާއްޖެ ވަޑައިގަތުމަށް ރައީސް ޑރ. މުހައްމަދު މުއިއްޒު ދެއްވައިފި އެވެ.

އެ ދައުވަތު ރައީސް ދެއްވީ އެ މަނިކުފާނު މެލޭޝިއާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ދެ ގައުމު ގުޅިގެން މިއަދު ދެއްވި ޖޮއިންޓް ޕްރެެސްގައެވެ.

ރައީސް ވިދާޅުވީ ރާއްޖެއާއި މެލޭޝިއާ ދެމެދު ސިޔާސީ ގުޅުން ގާއިމުކުރިތާ 57 އަހަރުވެފައިވާއިރު އަންވަރާއެކު މިއަދު ބޭއްވެވި މަޝްވަރާތަކުގައި އެ ގުޅުން މިހާރަށްވުރެ އިތުރަށް ވަރުގަދަކުރަން މަޝްވަރާ ކުރައްވާފައިވާ ކަމަށެވެ.

އަދި މެލޭޝިއާއަކީ ދިވެހިން އެންމެ ގިނައިން މަތީ ތައުލީމު ހޯދަމުން އަންނަ ގައުމު ކަމަށާއި އެކަމުގެ ސަބަބަކީ ދިވެހިންނަށް ހާއްސަކޮށް މެލޭޝިއާގެ ސަރުކާރުން ވިސާގެ ކަންކަން ފަސޭހަކޮށްދީފައި އޮތުން ކަމަށްވެސް ރައީސް ވިދާޅުވި އެވެ.

ރައީސް ވަނީ މެލޭޝިއާގެ ވިޔަފާރިވެރިން ރާއްޖޭގައި އިންވެސްޓްމެންޓް ކުރުމަށް ދައުވަތު ދެއްވައިފަ އެވެ.