އަޒްމިރަލްދާގެ ވަރުގަދަ ރައްދެއް: ޕީއެންސީގެ މެންބަރުން މަސައްކަތްކުރީ އަޅުވެތި ކުދި ސޯބުތަކެއް ގޮތަށް!

އޭނާ ވަކިކުރަން ރައްޔިތުންގެ މަޖިލީހުން ނިންމީ އެއްވެސް ކުށެއް ނުކުރާކަން ވެރިކަން ހިންގާ ޕާޓީ، ޕީއެންސީއަށް ނިސްބަތްވާ މަޖިލީހުގެ ސުޕަ މެޖޯރިޓީ މެންބަރުންނަށްވެސް އެނގިވަޑައިގެން ތިއްބަވައި، ރައްޔިތުންގެ މަޖިީހުގެ މެންބަރުންގެ ޒިންމާ އަދާކުރެއްވުމުގެ ބަދަލުގައި ސިޔާސީ އެންގުންތަކަށް ބަޓަނަށް ފިތާލާ، ބުއްދީގެ ހަމަތަކާއި އިންސާފު އިސްނުކުރައްވާ އަޅުވެތި ކުދި ސޯބުތަކެއްގެ ގޮތުގައި މަސައްކަތް ކުރައްވައިގެން ކަމަށް ސުޕްރީމް ކޯޓުގެ ފަނޑިޔާރު ކަމުން މިއަދު ވަކިކުރެއްވި ޑރ. އަޒްމިރަލްދާ ޒާހިރު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފި ނަމަ، ގޮނޑި ގެއްލޭ ގޮތަށް ގެންނަން އުޅުނު އިސްލާހަކީ ގާނޫނުއަސާސީއާ ހިލާފު އިސްލާހެއް ކަމަށް ބުނެ އެ އިސްލާހު ބާތިލުކުރުމަށް ސުޕްރީމް ކޯޓަށް ހުށަހެޅި ދުސްތޫރީ މައްސަލައިގެ އަޑުއެހުންތައް ފަށަން ތައްޔާރުވެފައި އޮއްވައި، ޖުޑީޝަލް ސާވިސް ކޮމިޝަން (ޖޭއެސްސީ) އިން އަޒްމިރަލްދާ ސަސްޕެންޑްކޮށް ސުލޫކީ މައްސަލަތަކެއް ބަލަން ފެށީ ފެބްރުއަރީ މަހުގެ ފަހުކޮޅު އެވެ.

އަޒްމިރަލްދާގެ އިތުރުން ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރައި ފަނޑިޔާރު ހުސްނުއްސުއޫދާ ގުޅޭ ޖިނާއީ ތަހުގީގެއްވެސް ޖޭއެސްސީން ފެށި އެވެ. ނަމަވެސް އެ މައްސަލަތަކަކީ ޖުޑީޝަރީއަށް ނުފޫޒު ފޯރުވުމަށް ހިންގާ ކަމެއް ކަމަށް ބުނެ އެ ތުހުމަތުތަކަށް އެ ބޭފުޅުން ވަނީ އިންކާރު ކުރައްވައިފައެވެ. އަދި އެ ތުހުމަތުތަކާ ގުޅިގެން ހަތަރެއް މާޗުގައި ސުއޫދު ފަނޑިޔާރުކަމުގެ މަގާމުން އިސްތިއުފާ ދެއްވި އެވެ.

އެ މައްސަލައިގައި މިއަދު އަޒްމިރަލްދާ އާއި މަހާޒު ވަކިކުރަން ރައްޔިތުންގެ މަޖިލީހުން ފާސްކުރުމުން އަޒްމިރަލްދާ މިއަދު ނެރުއްވި ބަޔާނެއްގައި ވިދާޅުވީ، އޭނާގެ ސަސްޕެންޝަން ބިނާވާ މައްސަލައިގެ ލިޔެކިޔުންތައް އަދި އަދަށް ދާންދެން އޭނާއަށް ލިބިފައިނުވާ ކަމަށެވެ. އަދި އެންޓި ކޮރަޕްޝަން ކޮމިޝަން (އޭސީސީ) އިން އޭނާގެ ޖިނާއީ ތަހުގީގެއް ކުރާ ކަމަށް 26 ފެބްރުއަރީގައި ޖޭއެސްސީއަށް އެންގި ނަމަވެސް، އަދި އަދަށްދާންދެން އޭނާއާ އެއްވެސް ސުވާލެއް އޭސީސީން ކޮށްފައިނުވާ ކަމަށްވެސް ވިދާޅުވި އެވެ.

”26 ފެބްރުއަރީ 2025 އިން ފެށިގެން މިއަދާ ހަމައަށް މި ކުރެވުނީ ގޮންޖެހުންތަކާއި ހުރަސްތަކުން ފުރިގެންވާ ދަތުރެކެވެ. ސަބަބަކީ ރާއްޖޭގައި ގާނޫނުގެ ވެރިކަން ނުހިނގުމެވެ. ގާނޫނުގެ ވެރިކަން ހިނގާނަމަ ގާނޫނުގައި ބަޔާންކުރާ ގޮތަށް އަމަލުކޮށް އަސާސީ ހައްގުތައް ކަށަވަރު ކުރެވި، ނުހިނގާ ކަމެއް ހިނގި ކަމަކަށް ހަދައިގެން ބަޔަކު އަޅުގަނޑުގެ މައްސަލަ ތަހުގީގު ނުކުރާނެ އެވެ،“ އަޒްމިރަލްދާ ވިދާޅުވި އެވެ.

އޭނާ ވިދާޅުވީ، ގާނޫނުއަސާސީން ކޮންމެ މީހަކަށްމެ ކަށަވަރުކޮށްދީފައިވާ އެންމެ އަސާސީ އެއް ހައްގަކީ ގާނޫނީ ވަކީލެއްގެ އެހީތެރިކަން ހޯދުމުގެ ހައްގު ކަމަށްވާއިރު، އެ ހައްގު ޖޭއެސްސީން ހަނިކުރި ކަމަށެވެ. އަދި ތުހުމަތުން ދިފާއުވުމަށް ބޭނުންވާ އަސާސީ ލިޔެކިޔުންތައް އެ ކޮމިޝަނުން ހިއްސާނުކޮށް، ދިފާއުވުމުގެ ހައްގު ނިގުޅައިގެން އިރު، ދިފާއީ ހުރިހާ ހެއްކެއް ބަލައިނުގަންނަން ނިންމައި ގޮތް ނިންމީ ހެއްކެއް ނެތަސް އެ ކޮމިޝަނުން ގަބޫލުކުރާހިތްވި ގޮތަށް ކަމަށް ވިދާޅުވި އެވެ.

އަޒްމިރަލްދާ ވިދާޅުވީ، ޖޭއެސްސީންނާއި މަޖިލީހުގެ ޖުޑީޝަރީ ކޮމިޓީންވެސް މައްސަލައިގެ އަޑުއެހުންތައް ސިއްރުކޮށްގެން ކުރިއަށް ގެންދިއުމަކީ ކަންބޮޑުވި ކަމެއް ކަމަށެވެ. އަދި އެ ކޮމިޓީއަށް ހާޒިރުވެ ދިފާއުވާނެ ފުރުސަތުންވެސް މަހުރޫމު ކުރި އިރު، ޑިއު ޕްރޮސެސްއާއި އަސާސީ ހައްގުތައް މިއަދު ޖޯކަކަށް ވެފައިވާ ކަމަށްވެސް ވިދާޅުވި އެވެ.