އީރާނުން 100 އަށްވުރެ ގިނަ ޑްރޯން ފޮނުވާލައިފި، ނާކާމިޔާބު ކޮށްލުމުގައި އިޒްރޭލު ވަރަށް ބިޒީ!

އިޒްރޭލުން ރޭ ދަންވަރު އީރާނަށް ދިން ހަމަލާގެ ބަދަލުގައި އެ ގައުމުން 100 އަށްވުރެ ގިނަ ޑްރޯން ފޮނުވާލާފައިވާ ކަމަށް އިޒްރޭލުން ބުނެފި އެވެ.

އިސްރާއީލްގެ އަސްކަރިއްޔާގެ ތަރުޖަމާނު ބްރިގޭޑިއާ ޖެނަރަލް އެފީ ޑެފްރިން ބުނީ މިދިޔަ މަދު ގަޑިއިރުތަކުގެ ތެރޭގައި އީރާނުން އިޒްރޭލަށް 100 އަށްވުރެ ގިނަ ޑްރޯން ފޮނުވާލާފައިވާ ކަމަށާއި އެ ހަމަލާ ނާކާމިޔާބު ކޮށްލަން މަސައްކަތް ކުރަމުން އަންނަ ކަމަށެވެ.

އީރާނުން ފޮނުވާލި ޑްރޯންތައް އިޒްރޭލަށް ފޯރަން ގަޑިއިރުތަކެއް ނަގާނެ އެވެ.

އީރާނުން އިޒްރޭލަށް ޑްރޯންތަކެއް ފޮނުވާލާފައި މިވަނީ އިޒްރޭލުން ދިން ވަރުގަދަ ހަމަލާތަކާ ގުޅިގެން ހަރުކަށި އަދަބެއް ދެއްވާނެ ކަމަށް އީރާނުގެ ރޫހީ ވެރިޔާ އާޔަތުالله އަލީ ހަމަނާއީ ވިދާޅުވިތާ މާގިނައިރުތަކެއް ނުވެ އެވެ.

ހާމަނާއީ ވިދާޅުވީ އީރާނާ ދެކޮޅަށް އިޒްރޭލުން ދެމުންދާ ހަމަލާތަކާއި ހިންގަމުންދާ ޖަރީމާތަކުން އެ މީހުންގެ ނުބައި ނުލަފާ، ލެއިން ތަަތްތެޅިފައިވާ އަތް ދައްކަމުންދާ ކަމަށެވެ. އަދި އެ ހަމަލާތަކުގެ ބަދަލުގައި އީރާނުން ދޭ އަދަބު ވެގެން ދާނީ ހަރުކަށި އަދަބަކަށް ކަމަށްވެސް ވިދާޅުވި އެވެ.

”އިޒްރޭލުން އެ ވަނީ އެ މީހުންގެ އަމިއްލަ ނެތިދިއުމަށް ތައްޔާރުވެފައި، އެކަމުގެ ރަހަ އެ މީހުން ދެކޭނެ،“ އީރާނުގެ ދައުލަތުގެ ޓީވީ މެދުވެރިކޮށް ހާމަނާއީ ދެއްވި އިންޒާރުގައި ވިދާޅުވި އެވެ.

އީރާނުގެ ނިއުކްލިއާ މަރުކަޒުތަކަށާއި އަސްކަރީ މަރުކަޒުތަކަށް އަމާޒުކޮށް އިޒްރޭލުން ދިން ހަމަލާތަކުގައި އީރާނުގެ ސިފައިންގެ އެންމެ އިސް ވެރިޔާ ޗީފް އޮފް ސްޓާފް ޖެނެރަލް މުހައްމަދު ބަގޭރީ އާއި އީރާނުގެ އިންގިލާބީ ފައުޖުގެ އިސްވެރިޔާ، ހުސައިން ސަލާމީ އަދި ދެ ނިއުކްލިއާ ސައިންޓިސްޓުން ވަނީ ޝަހީދުވެފަ އެވެ.